مالی سال 26-2025 کے پہلے دن یکم جولائی کو حکومت نے آئی ایم ایف کی پہلی شرط پوری کر دی۔۔10 جولائی سے ملک بھر میں یوٹیلیٹی اسٹورز بند کرنے کا اعلان کر دیا گیا ہے۔
آئی ایم ایف نے حکومت سے خسارے میں چلنے والے تمام سرکاری اداروں کو بند کرنے یا ان کو فروخت کرنے کی شرط عائد کی ہوئی ہے۔
تمام ملازمین کو ریٹائرمنٹ کی رضاکارانہ اسکیم دینے کا فیصلہ۔ وزیراعظم نے پیکج کی منظوری دے دی
تمام فعال یوٹیلیٹی اسٹورز 10 جولائی سے ملک بھر میں آپریشنز بند کرنا شروع کر دیں گے، ایم ڈی یوٹیلیٹی اسٹورز کارپوریشن کے زیرِ صدارت اجلاس میں فیصلہ ہوا ہے کہ اسٹورز پر موجود سامان کو وئیر ہاؤسز میں منتقل کیا جائے گا جبکہ وئیر ہاؤسز سے سامان حکام کی سرپرستی میں دکانداروں کو واپس کیا جائے گا۔
فیصلہ کیا گیا ہے کہ ملک بھر کے اسٹورز اور دیگر دفاتر میں موجود آئی ٹی سامان بھی لوٹایا جائے گا، اسی طرح ریکس اور دیگر سامان کی شفاف عمل کے ذریعے نیلامی کی جائے گی۔
اجلاس میں مزید فیصلہ کیا گیا کہ کرائے پر دیے گئے اسٹورز کو یکم اگست سے خالی کرنے کے نوٹس جاری کیے جائیں گے، یوٹیلیٹی اسٹورز کے اثاثوں کے تعین کے لیے جنرل منیجرز آئی ٹی کے ذریعے تخمینہ لگوایا جائے گا۔
واضح رہے کہ مارچ 2025 میں حکومت نے خسارے کا شکار 1700 یوٹیلٹی اسٹورز بند اور کنٹریکٹ و ڈیلی ویجز ملازمین کو فارغ کرنے کا فیصلہ کیا تھا۔
