لاہور — روسی زبان و ثقافت میں دلچسپی رکھنے والے پاکستانی طلباء کے لیے ایک بڑی خبر، صوبائی دارالحکومت میں روسی زبان کے کورسز کا باضابطہ آغاز ہو گیا۔ یہ اقدام روسی سنٹر فار سائنس، ایجوکیشن اور کلچر کے زیرِ اہتمام عمل میں لایا گیا ہے۔
افتتاحی تقریب سے خطاب کرتے ہوئے روسی سائنسی و تعلیمی سفیر ڈاکٹر شاہد حسن نے کہا”ہمارا مقصد صرف زبان سکھانا نہیں بلکہ روسی جامعات میں اعلیٰ تعلیم کے خواہش مند طلباء کو ایک ایسا پلیٹ فارم فراہم کرنا ہے جہاں وہ مکمل رہنمائی، اسکالرشپ مواقع اور داخلہ سہولیات حاصل کر سکیں۔”
انہوں نے اس بات کی بھی نشاندہی کی کہ کرغزستان کی یونیورسٹیوں میں پاکستانی طلباء کے لیے خصوصی داخلہ سپورٹ پروگرامز بھی اس منصوبے کا حصہ ہیں۔
سینٹر کے شریک چیئرمین پروفیسر ڈاکٹر اشرف نظامی نے کورس کی تفصیلات بیان کرتے ہوئے کہا”یہ کورسز کامیابی سے مکمل کرنے والوں کو جاری ہونے والے سرٹیفکیٹ روس اور پاکستان دونوں ممالک کی اعلیٰ تعلیمی اداروں میں تسلیم کیے جائیں گے، جس سے طلباء کو بین الاقوامی مواقع میں بھرپور فائدہ حاصل ہوگا۔”
روسی نژاد انسٹرکٹر محترمہ نتاشا نتالیہ نے کہا کہ یہ زبان سیکھنے کا تجربہ محض گرامر یا الفاظ تک محدود نہیں رہے گا”طلباء کو روسی ادب، فنون، اور ثقافتی تاریخ میں بھی غرق کیا جائے گا، جس سے ان کی زبان فہمی اور تناظر کی صلاحیت میں بھرپور اضافہ ہوگا۔”
تقریب کا اختتام روایتی کیک کاٹنے کی تقریب پر ہوا، جس میں مختلف جامعات، علمی حلقوں، اور تعلیمی اداروں سے تعلق رکھنے والے افراد، اسکالرز، اور نوجوان طلباء نے بڑی تعداد میں شرکت کی — جو روسی-پاکستانی تعلیمی تعلقات کی نئی جہت کا مظہر تھا۔
About The Author
