لاہور : لاہور میں کرائم کنٹرول ڈیپارٹمنٹ (سی سی ڈی) سے فائرنگ کے مبینہ تبادلے کے دوران 13 سالہ بچی کا گینگ ریپ کرنے والے 2 ملزمان ہلاک ہو گئے ۔
کرائم کنٹرول ڈیپارٹمنٹ کے مطابق ملزمان نے 2 روز قبل مانگامنڈی سے لیڈی ڈاکٹر کی 13 سالہ بیٹی کو اغوا کر کے اجتماعی زیادتی کا نشانہ بنایا تھا۔
سی سی ڈی جب ملزمان کو گرفتار کرنے پہنچی تو انہوں نے اہلکاروں پر فائرنگ کر دی، جوابی کارروائی میں دونوں ملزمان ہلاک ہوگئے۔
فائرنگ کے تبادلے میں سب انسپکٹر شبیر شدید زخمی ہوگئے، جنہیں طبی امداد کے لیے اسپتال منتقل کر دیا گیا۔
واضح رہے کہ پنجاب میں حالیہ دنوں میں خواتین اور بچیوں سے ریپ اور انہیں ہراساں کرنے کے واقعات میں ملوث ملزمان کی پولیس مقابلوں میں ہلاکت اور زخمی ہونے کے واقعات میں اضافہ ہوا ہے۔
یاد رہے کہ کچھ دن قبل لاہور کے علاقے چوہنگ میں خاوند کے سامنے بیوی سے گینگ ریپ کا واقعہ پیش آیا تھا، واقعے میں 4 ملزمان اویس، زاہد، ارشاد اور عمران کو نامزد کیا گیا تھا، بعدازاں چاروں ملزمان 3 الگ الگ مبینہ مقابلوں میں مارے گئے تھے۔
