پشاور — خیبر پختونخوا کے بالائی اور زیریں دیر سمیت چترال میں شدید بارشوں اور سیلاب کے باعث ایجوکیشنل ٹیسٹنگ اینڈ ایویلیوایشن اتھارٹی (ایٹا) کے آج ہونے والے تمام ٹیسٹ ملتوی کر دیے گئے ہیں۔
ایٹا حکام کے مطابق متاثرہ اضلاع میں امتحانی مراکز تک پہنچنا ممکن نہیں رہا اور موجودہ صورتحال میں امتحانات کا انعقاد کسی صورت ممکن نہیں تھا۔
ڈائریکٹر ایٹا نے اپنے بیان میں کہا کہ ملتوی کیے گئے ٹیسٹ کی نئی تاریخوں کا اعلان حالات بہتر ہونے پر جلد کیا جائے گا۔ ان کا کہنا تھا کہ طلبہ و طالبات کی سہولت کو ہر ممکن ترجیح دی جائے گی اور فیصلے زمینی حقائق کو مدنظر رکھتے ہوئے کیے جائیں گے۔
حکام نے مزید کہا کہ سیلابی صورتحال پر مسلسل نظر رکھی جا رہی ہے اور امتحانات کے نئے شیڈول کے بارے میں امیدواروں کو بروقت آگاہ کیا جائے گا۔
