راولپنڈی: فیلڈ مارشل سید عاصم منیرنے خیبر پختونخوا میں حالیہ سیلاب سے متاثرہ عوام کی بحالی کے لیے خصوصی ہدایات جاری کر دی ہیں۔ سیکیورٹی ذرائع کے مطابق، آرمی چیف نے کہا ہے کہ خیبر پختونخوا میں تعینات پاک فوج متاثرہ عوام کی بحالی میں بھرپور کردار ادا کرے گی۔
ذرائع کے مطابق، اس سلسلے میں اضافی فوجی دستے بھی متاثرہ علاقوں کی طرف روانہ کیے جا رہے ہیں تاکہ ریسکیو اور ریلیف آپریشنز میں مزید تیزی لائی جا سکے۔ پاک فوج نے اپنا ایک دن کا راشن، جو 600 ٹن سے زائد ہے، اور ایک دن کی تنخواہ خیبر پختونخوا کے سیلاب زدہ عوام کے لیے مختص کر دی ہے۔
آرمی چیف نے کور آف انجینئرز کو ہدایت دی ہے کہ وہ متاثرہ علاقوں میں ٹوٹے ہوئے پلوں کی جلد از جلد مرمت مکمل کریں اور جہاں ضروری ہو، وہاں فوری طور پر عارضی پل قائم کیے جائیں تاکہ امدادی کارروائیاں متاثر نہ ہوں۔
آرمی کے نائن یونٹ کے ریسکیو سنیفنگ ڈاگ یونٹ کو بھی سرچ اینڈ ریسکیو کے لئے بھیجا جا رہا ہے، جبکہ خصوصی اربن سرچ اینڈ ریسکیو ٹیم پہلے ہی آرمی چیف کی ہدایت پر متاثرہ علاقوں میں امدادی سرگرمیوں میں حصہ لے رہی ہے۔
پاک فوج کے ہیلی کاپٹرز اور آرمی ایوی ایشن کے یونٹس پہلے ہی متاثرہ علاقوں میں امدادی کاموں کے لیے تعینات ہیں اور مسلسل ریلیف کا سامان پہنچا رہے ہیں۔ سیکیورٹی ذرائع کے مطابق، پاک فوج مشکل کی ہر گھڑی میں خیبر پختونخوا کے بہادر عوام کے ساتھ شانہ بشانہ کھڑی ہے اور ان کی بحالی تک ہر ممکن مدد فراہم کرتی رہے گی۔
About The Author
