اسلام آباد: نائب وزیراعظم و وزیر خارجہ اسحاق ڈار نے کہا ہے کہ کشمیر اور فلسطین جیسے تنازعات سے امن کو خطرہ ہے، پاکستان نے ہمیشہ تنازعات کو پرامن طریقے سے حل کرنے پر زور دیا۔
اسلام آباد میں ایک کانفرنس سے خطاب کرتے ہوئے وزیر خارجہ نے کہا کہ امن، استحکام اور ترقی کا آپس میں گہرا تعلق ہے، پارلیمانی سفارت کاری مذاکرات میں اہم کردار ادا کر سکتی ہے، پارلیمانی سفارتکاری سے باہمی احترام کو فروغ دیا جا سکتا ہے۔
انہوں نے کہا کہ پاکستان کو موسمیاتی تبدیلی جیسے سنگین چیلنجز کا سامنا ہے، دنیا کو آج عدم استحکام، بحران اور جنگوں کا سامنا ہے، پارلیمانی لیڈرز کے درمیان رابطوں اور تبادلوں کا فروغ وقت کا تقاضا ہے۔
اسحاق ڈار کا مزید کہنا تھا کہ علاقائی امن و استحکام کے لیے مل کر کام کرنے کی ضرورت ہے، ماحولیاتی انصاف کے لیے سب کو مل کر آواز اٹھانا ہوگی، پاکستان ماحولیاتی تبدیلی سے متاثرہ 10 ممالک میں شامل ہے جبکہ پاکستان کا ماحولیاتی تبدیلی میں حصہ ایک فیصد بھی نہیں۔
نائب وزیراعظم نے کانفرنس کے شرکاء سے کہا کہ عالمی اقتصادی نظام میں اصلاحات کی ضرورت ہے۔
