ریاستی اداروں کیخلاف پراپیگنڈا کیس میں پی ٹی آئی کارکن فلک جاوید کا 5 روزہ جسمانی ریمانڈ منظور کرلیا گیا۔
نیشنل سائبرکرائم انویسٹی گیشن ایجنسی نے فلک جاوید کو لاہور کی مقامی عدالت میں پیش کردیا، ضلع کچہری میں جوڈیشل مجسٹریٹ محمد نعیم وٹو نے کیس کی سماعت کی۔
این سی سی آئی اے نے فلک جاویدکا 30 دن کا جسمانی ریمانڈمانگ لیا تاہم عدالت نے 5 روزہ جسمانی ریمانڈ منظور کرلیا۔ پراسکیوٹر نے عدالت کو بتایا کہ ملزمہ کا موبائل فرانزک کےلئے چاہیے، ملزم کی رہائش پر ریڈ کیا تویہ روپوش ہوگئی۔ ہم نے ملزمہ کی گرفتاری کےلیے 36ریڈ کیے، ملزمہ ہماری اس انکوائری میں اشتہاری ہیں۔
یاد رہے کہ نیشنل سائبر کرائم انویسٹی گیشن ایجنسی نے گزشتہ روز سوشل میڈیا پر متحرک کارکن فلک جاوید کو لاہور کے علاقے اچھرہ سے گرفتار کرلیا ہے۔
ذرائع کے مطابق فلک جاوید این سی سی آئی اے کو دو مختلف مقدمات میں مطلوب تھیں اور ان کے خلاف ریاستی اداروں کے خلاف مبینہ پراپیگنڈے اور ایک خاتون سیاستدان کے خلاف نازیبا زبان استعمال کرنے کے الزامات میں مقدمات درج ہیں۔
