اسلام آباد: فیڈرل بورڈ آف ریونیو (ایف بی آر) نے امپورٹ پالیسی آرڈر 2022 کے تحت مخصوص شرائط کے ساتھ درآمد کی جانے والی پرانی اور استعمال شدہ گاڑیوں پر 40 فیصد ریگولیٹری ڈیوٹی عائد کردی ہے۔
جاری نوٹیفکیشن کے مطابق یہ ڈیوٹی ان گاڑیوں پر لاگو ہوگی جو پی سی ٹی ہیڈنگ 8702، 8703، 8704 اور 8711 کے تحت آتی ہیں۔ اس اقدام کا مقصد تجارتی بنیادوں پر گاڑیوں کی درآمد کو محدود کرنا اور غیر ملکی زرمبادلہ کے اخراج کو کنٹرول کرنا ہے۔
ایف بی آر نے یہ ڈیوٹی کسٹمز ایکٹ 1969 کے سیکشن 18 کے سب سیکشن (3) کے تحت حاصل اختیارات استعمال کرتے ہوئے عائد کی۔
