کراچی: پاکستانی اداکارہ اور پروڈیوسر عائشہ عمر نے اپنے کیریئر کے ابتدائی دنوں کے چیلنجز پر بات کرتے ہوئے انکشاف کیا ہے کہ کم عمری میں شوبز انڈسٹری میں داخل ہونے کے بعد کئی لوگ اپنی حدود سے تجاوز کرنے کی کوشش کرتے تھے۔
ایک حالیہ کامیڈی شو میں گفتگو کے دوران اداکارہ نے بتایا کہ شوبز کے سفر کے آغاز میں انہیں سنجیدگی سے نہیں لیا جاتا تھا کیونکہ ایک تو ان کی عمر کم تھی اور دوسرا وہ ایک کھلنڈری لڑکی کے طور پر نظر آتی تھیں۔
عائشہ عمر کا کہنا تھا کہ "بہت سے مرد حضرات حدیں کراس کرنے کی کوشش کرتے تھے، اس دوران مجھے خود کو مضبوط ظاہر کرنا پڑا تاکہ کوئی یہ نہ سمجھے کہ میں کمزور ہوں، اسی لیے میں نے نان سینس رویہ اپنایا تاکہ لوگ مجھے سنجیدگی سے لیں۔”
انہوں نے مزید کہا کہ جب وہ لاہور سے کراچی منتقل ہوئیں اور اکیلے زندگی گزارنے لگیں تو یہ رویہ اور بھی ضروری ہو گیا کیونکہ اکیلی لڑکی کو اکثر کمزور سمجھا جاتا ہے۔
اداکارہ نے کیریئر میں بعض غلطیوں کا اعتراف بھی کیا اور بتایا کہ انہوں نے ماضی میں کچھ ایسے ایوارڈ شوز کیے جن کی مکمل ادائیگی انہیں آج تک نہیں مل سکی۔
