اسلام آباد: امریکی جریدے بلوم برگ کے مطابق پاکستان ان چند ممالک میں شامل ہے جن کے دیوالیہ ہونے کے خدشات میں نمایاں کمی آئی ہے۔ رپورٹ کے مطابق پاکستان کی معاشی کارکردگی دنیا کی ابھرتی ہوئی معیشتوں میں دوسرے نمبر پر رہی، جبکہ اس فہرست میں صرف ترکیہ پاکستان سے آگے ہے۔
بلوم برگ کے تازہ اعداد و شمار کے مطابق جون 2024 سے ستمبر 2025 کے درمیان پاکستان کے دیوالیہ ہونے کے امکانات میں 2200 پوائنٹس کی بہتری ریکارڈ کی گئی، جو ملکی معیشت میں پائیدار بہتری اور سرمایہ کاروں کے اعتماد کی بحالی کی واضح علامت ہے۔
رپورٹ میں کہا گیا ہے کہ پاکستان کے برعکس جنوبی افریقہ، ایل سلواڈور اور دیگر ممالک میں بہتری کی رفتار سست رہی، جبکہ مصر، نائیجیریا اور ارجنٹائن جیسے ممالک میں معاشی خطرات مزید بڑھ گئے ہیں۔
بلوم برگ کے مطابق یہ مثبت پیش رفت اس بات کا ثبوت ہے کہ عالمی سرمایہ کار دوبارہ پاکستان کی معیشت پر اعتماد ظاہر کر رہے ہیں اور اقتصادی پالیسیوں میں استحکام کے آثار نمایاں ہو رہے ہیں۔
