پنجاب میں محفوظ بسنت کی مشروط اور محدود اجازت کے حوالے سے تجاویز پر غور کیا گیا۔
سیکرٹری داخلہ پنجاب ڈاکٹر احمد جاوید قاضی کی زیر صدارت محفوظ بسنت کے حوالے سے اجلاس ہوا ۔ اجلاس میں محفوظ بسنت کی مشروط اور محدود اجازت کے حوالے سے تجاویز پرغور کیا گیا ۔ جشن بہاراں کے دوران مخصوص دنوں کیلئے بعض علاقوں میں محفوظ بسنت کے امکانات زیر بحث لائے گئے ۔
اجلاس میں پتنگ بازی پر ممانعت کے قانون میں مجوزہ ترامیم پر بھی تفصیلی غور کیا گیا۔اجلاس کے شرکا نے تجویز دی کہ جشن بہاراں کے دوران ثقافتی سرگرمی کے طور پر محفوظ بسنت کی اجازت دی جا سکتی ۔ محفوظ بسنت منانے کیلئے متعلقہ ضلع کے ڈپٹی کمشنر سے این او سی لیا جائے گا ۔ جس چھت یا احاطے کیلئے این او سی لیا جائے اسکے مالک کو حفاظتی اقدامات کا بیان حلفی دینا ہو گا ۔
تندی، دھاتی ڈور، مانجھا لگی ڈور کے استعمال کی کسی صورت اجازت نہیں ہوگی ۔ پتنگ ساز، پتنگ فروش اور سپلائر کیلئے ڈپٹی کمشنر سے رجسٹریشن لازمی ہوگی۔
سیکرٹری داخلہ احمد جاوید کا کہنا ہے قانون کی خلاف ورزی پر رجسٹریشن منسوخی کیساتھ قید اور جرمانہ ہوگا ۔ بغیر اجازت پتنگ بازی اور فروخت کرنے والے بھاری جرمانے اور طویل قید کی سزا کاٹیں گے ۔ انہوں نے کہا کہ والڈ سٹی اتھارٹی محفوظ بسنت بارے عوامی رائے جاننے کیلئے سروے کرے گی۔
