ٹرمپ کا بیان: روس کے ساتھ جنگ میں”یوکرین کی فتح کے امکانات کم ہیں، مگر تنازعہ جلد حل ہو جائے گا”

واشنگٹن: امریکی صدر ڈونلڈ ٹرمپ نے کہا ہے کہ وہ موجودہ روس-یوکرین جنگ میں یوکرین کی فتح پر یقین نہیں رکھتے، تاہم انہیں امید ہے کہ یہ تنازعہ بالآخر امن کے ذریعے حل ہو جائے گا۔

ٹرمپ نے یہ بات آسٹریلوی وزیر اعظم انتھونی البانی کے ساتھ وائٹ ہاؤس میں ملاقات کے آغاز پر صحافیوں سے گفتگو کے دوران کہی۔ ایک صحافی نے ان سے ان کے حالیہ بیان پر وضاحت مانگی تھی جس میں انہوں نے اشارہ دیا تھا کہ یوکرین شاید اپنی پرانی سرحدوں پر واپس نہ جا سکے۔

امریکی صدر نے کہا "وہ اب بھی جیت سکتے ہیں۔ مجھے نہیں لگتا کہ وہ جیتیں گے، لیکن وہ پھر بھی جیت سکتے ہیں۔ میں نے کبھی نہیں کہا کہ وہ جیت جائیں گے۔”

ٹرمپ نے یہ بھی دعویٰ کیا کہ ان کی سفارتی کوششوں سے دنیا کے مختلف خطوں میں آٹھ مسلح تنازعات پہلے ہی حل کیے جا چکے ہیں۔
انہوں نے مزید کہا "میں نے آٹھ مہینوں میں آٹھ جنگیں طے کی ہیں، برا نہیں ہے۔ اب ایک تنازعہ باقی ہے — روس اور یوکرین — اور مجھے یقین ہے کہ ہم وہاں بھی پہنچ جائیں گے۔”

ان کے اس بیان کو بین الاقوامی مبصرین نے یوکرین کے لیے ایک نرم موقف کے طور پر دیکھا ہے، خاص طور پر ایسے وقت میں جب امریکہ اور اس کے اتحادی کییف حکومت کی مالی اور عسکری امداد پر نظرِ ثانی کر رہے ہیں۔

ٹرمپ کے ناقدین کا کہنا ہے کہ یہ بیان روس کے لیے سفارتی رعایت کے مترادف ہے، جبکہ ان کے حامیوں کا ماننا ہے کہ ٹرمپ کی ترجیح جنگ کے بجائے امن معاہدے کے امکانات بڑھانا ہے۔