بیجنگ — چین کی صنعتی معیشت نے 2025 کی پہلی تین سہ ماہیوں میں مستحکم ترقی کا رجحان برقرار رکھا ہے۔
سرکاری اعداد و شمار کے مطابق، جنوری سے ستمبر کے دوران چین کی صنعتی پیداوار میں سالانہ بنیاد پر 6.2 فیصد اضافہ ریکارڈ کیا گیا، جو ملک کی اقتصادی بحالی کی مضبوط رفتار کو ظاہر کرتا ہے۔
چینی نشریاتی ادارے سی جی ٹی این (CGTN) کے مطابق، اس عرصے کے دوران 41 بڑے صنعتی شعبوں میں سے 37 شعبوں نے سال بہ سال ترقی دکھائی، جب کہ 623 بڑی صنعتی مصنوعات میں سے 385 مصنوعات کی پیداوار میں بھی اضافہ دیکھا گیا۔
اعداد و شمار کے مطابق، مینوفیکچرنگ سیکٹر میں نمایاں بہتری آئی اور نامزد سائز سے بڑی صنعتوں کی اضافی قدر میں 9.7 فیصد اضافہ ہوا، جب کہ ایکسپورٹ ڈلیوری ویلیو میں 3.3 فیصد سالانہ اضافہ ریکارڈ کیا گیا۔
مزید برآں، چین میں جدید توانائی کے آلات جیسے ونڈ ٹربائنز، نیوکلیئر ٹربائنز اور سولر سیلز کی پیداوار میں بالترتیب 72.4 فیصد، 38.9 فیصد اور 14 فیصد اضافہ ہوا، جو ملک کی گرین انڈسٹریل پالیسیوں کی کامیابی کو ظاہر کرتا ہے۔
رپورٹ کے مطابق، جنوری سے اگست کے دوران صنعتی اداروں کے منافع میں بھی بہتری آئی ہے اور 0.9 فیصد سالانہ اضافہ ریکارڈ کیا گیا، جس سے مئی 2025 سے جاری منافع میں کمی کا رجحان ختم ہو گیا۔
خاص طور پر نان فیرس میٹلز اور برقی مشینری کی صنعتوں میں بالترتیب 12.7 فیصد اور 11.5 فیصد منافع میں اضافہ دیکھا گیا۔
