نئی دہلی — بھارت نے طالبان وزیرِ خارجہ کے حالیہ دورۂ نئی دہلی کے فوراً بعد افغانستان کے دارالحکومت کابل میں اپنا سفارت خانہ باضابطہ طور پر بحال کر دیا۔
بھارتی وزارتِ خارجہ کی جانب سے جاری بیان میں کہا گیا کہ کابل میں پہلے سے موجود تکنیکی مشن کو اب مکمل سفارتی درجہ دے دیا گیا ہے، جس کا فیصلہ فوری طور پر نافذ العمل ہوگا۔
بیان کے مطابق، کابل میں سفارت خانے کی بحالی سے دونوں ممالک کے درمیان تعلقات کو مزید مضبوط بنانے اور باہمی دلچسپی کے تمام شعبوں میں تعاون کے فروغ میں مدد ملے گی۔
وزارت نے کہا کہ بحال شدہ سفارت خانہ افغانستان میں جامع ترقی، انسانی امداد، تعلیم، صحت اور استعداد کار میں اضافے کے منصوبوں میں فعال کردار ادا کرے گا — جو افغان عوام کی ضروریات اور خواہشات کے مطابق ہوں گے۔
وزارتِ خارجہ نے تصدیق کی کہ کابل میں سفارت خانے کی بحالی کا فیصلہ افغان وزیرِ خارجہ کے حالیہ بھارت دورے کے دوران طے پایا تھا۔
یہ دورہ طالبان حکومت اور بھارت کے درمیان تعلقات کی بحالی کے عمل میں ایک اہم پیش رفت سمجھا جا رہا ہے۔
