امریکا نئی جنگ بھڑکانا چاہتا ہے، ہم ایسا ہونے نہیں دیں گے

کاراکس — وینزویلا کے صدر نکولس مادورو نے امریکا پر الزام لگایا ہے کہ وہ خطے میں ایک نئی جنگ بھڑکانے کی کوشش کر رہا ہے، تاہم ان کا کہنا ہے کہ "ہم جنگ ہونے نہیں دیں گے”۔

مادورو نے یہ بیان امریکی طیارہ بردار بحری جہاز کو کیریبین سمندر بھیجنے کے فیصلے پر سخت ردعمل دیتے ہوئے دیا۔ انہوں نے کہا کہ امریکا کی اس پیش قدمی سے علاقائی استحکام کو خطرہ لاحق ہے، مگر وینزویلا امن کے راستے پر قائم رہے گا۔

صدر مادورو نے کہا “امریکا خطے کو تصادم کی طرف دھکیلنا چاہتا ہے، لیکن ہم جنگ کو روکنے کے لیے ہر ممکن کوشش کریں گے۔ وینزویلا امن، خودمختاری اور علاقائی اتحاد کا پرچم بلند رکھے گا۔”

دوسری جانب، کولمبیا کے صدر گستاوو پیٹرو نے بھی امریکی اقدامات کو مسترد کرتے ہوئے کہا کہ وہ دباؤ یا پابندیوں کے سامنے سر نہیں جھکائیں گے۔

پیٹرو نے واشنگٹن کی جانب سے ان پر منشیات سے متعلق غیرقانونی سرگرمیوں کے الزام میں عائد پابندیوں پر ردعمل دیتے ہوئے کہا “میں ایک قدم بھی پیچھے نہیں ہٹوں گا، اور نہ ہی گھٹنے ٹیکوں گا۔ ہمارا وقار فروخت نہیں کیا جا سکتا۔”

تجزیہ کاروں کے مطابق، امریکا کی جانب سے حالیہ عسکری سرگرمیوں نے کیریبین خطے میں کشیدگی میں اضافہ کر دیا ہے، جبکہ وینزویلا اور کولمبیا دونوں نے امریکا کی پالیسیوں کو "استعماری رویہ” قرار دیا ہے۔