ریاض – فلسطین کے وزیراعظم ڈاکٹر محمد مصطفیٰ نے منگل کو ریاض میں اپنی رہائش گاہ پر سعودی وزیر خارجہ شہزادہ فیصل بن فرحان بن عبداللہ سے ملاقات کی۔
یہ ملاقات فلسطینی وزیراعظم کے دورۂ ریاض کے دوران نویں فیوچر انویسٹمنٹ انیشی ایٹو (FII9) کانفرنس کے موقع پر ہوئی۔
سعودی پریس ایجنسی (SPA) کے مطابق دونوں رہنماؤں نے غزہ کی پٹی اور مغربی کنارے میں جاری صورتِ حال، فلسطینی عوام کے جائز حقوق، اور ایک آزاد فلسطینی ریاست کے قیام کے لیے جاری بین الاقوامی کوششوں پر تبادلہ خیال کیا۔
ملاقات میں خطے میں سلامتی اور استحکام کے فروغ کے لیے مشترکہ سفارتی اقدامات پر بھی گفتگو ہوئی، جن میں دو ریاستی حل سربراہی اجلاس، نیویارک اعلامیہ، امریکی صدر ڈونلڈ ٹرمپ کا اقدام، شرم الشیخ اعلامیہ اور ریاض میں منعقدہ عالمی رابطہ اجلاس شامل ہیں۔
فریقین نے اس بات پر اتفاق کیا کہ فلسطینی اتھارٹی کو بااختیار بنانا اور اس کے بجٹ کے لیے فوری مالی مدد فراہم کرنا ناگزیر ہے، تاکہ ادارہ جاتی اور مالی استحکام برقرار رکھا جا سکے۔
اس ضمن میں ہنگامی مالیاتی اتحاد کے قیام کی تجویز پر بھی غور کیا گیا، جو فلسطینی اداروں کے لیے پائیدار مالیاتی سپورٹ فراہم کرے گا۔
ملاقات میں غزہ کے تمام علاقوں تک انسانی امداد کی رسائی کو یقینی بنانے کی اہمیت پر بھی زور دیا گیا، تاکہ متاثرہ شہریوں کو انسانی ہمدردی کے اصولوں کے مطابق ریلیف فراہم کیا جا سکے۔
دونوں ممالک نے دو ریاستی حل کی حمایت اور خطے میں پائیدار امن کے قیام کے لیے مشترکہ سفارتی ہم آہنگی جاری رکھنے کے عزم کا اظہار کیا۔
