بیجنگ — چین نے امریکا کو نایاب معدنیات کی برآمد پر عائد پابندی عارضی طور پر ختم کر دی ہے۔ وزارتِ تجارت کی جانب سے جاری اعلامیے میں کہا گیا ہے کہ نایاب معدنیات سمیت اہم صنعتی دھاتوں کی برآمد کے لیے اب عام اجازت نامے جاری کیے جائیں گے۔
غیر ملکی میڈیا رپورٹس کے مطابق یہ فیصلہ چین اور امریکا کے درمیان جاری تجارتی تنازعات میں جزوی نرمی کی علامت ہے، تاہم تمام پابندیاں مکمل طور پر ختم نہیں کی گئیں۔
پہلے مرحلے میں چین نے گیلئم (Gallium)، جرمانیم (Germanium)، اینٹمونی (Antimony) اور سپر ہارڈ میٹریلز سے متعلق دوہرے استعمال کی اشیاء کی برآمد پر عائد پابندی کو معطل کیا ہے۔
وزارتِ تجارت کے مطابق یہ معطلی ایک سال کے لیے نافذ رہے گی اور اس کے بعد تجارتی حالات کا دوبارہ جائزہ لیا جائے گا۔
ماہرین کا کہنا ہے کہ بیجنگ کا یہ اقدام واشنگٹن کے ساتھ بڑھتی ہوئی اقتصادی کشیدگی میں ایک اہم موڑ ہے، کیونکہ عالمی سطح پر بیٹریوں، سیمی کنڈکٹرز اور دفاعی ٹیکنالوجی میں استعمال ہونے والی ان معدنیات کی مانگ تیزی سے بڑھ رہی ہے۔
چینی ماہرینِ معیشت کے مطابق یہ قدم ممکنہ طور پر امریکا کی جانب سے چینی کمپنیوں پر عائد تکنیکی پابندیوں کے جواب میں ایک نرم سفارتی اشارہ ہے، جس کا مقصد اقتصادی تعلقات میں جزوی استحکام پیدا کرنا ہے۔
About The Author
