کراچی — ایشیا کے سب سے بڑے یوتھ فٹبال ٹورنامنٹ سنگا کپ 2025 میں شاندار کارکردگی دکھانے والی لیاری فٹبال اکیڈمی کی ٹیم وطن واپس پہنچ گئی۔ کراچی ایئرپورٹ پر نوعمر فٹبالرز اور آفیشلز کا پرتپاک استقبال کیا گیا، جہاں شائقین نے کھلاڑیوں کو ہار پہنائے، پھول نچھاور کیے اور "پاکستان زندہ باد” کے نعرے لگائے۔
لیاری فٹبال اکیڈمی نے بوائز انڈر 16 ایونٹ میں رنر اپ کی حیثیت سے پاکستان کے لیے سلور میڈل حاصل کیا۔ یہ کامیابی نہ صرف لیاری بلکہ پورے ملک کے لیے فخر کا لمحہ قرار دی جا رہی ہے۔
ایئرپورٹ پر رکن سندھ اسمبلی محمد فاروق نے کھلاڑیوں کا استقبال کیا۔ ان کا کہنا تھا کہ "یہ نوجوان کھلاڑی پاکستان کا سرمایہ ہیں جنہوں نے محدود وسائل کے باوجود عالمی سطح پر ملک کا پرچم بلند کیا۔”
لیاری فٹبال اکیڈمی کے صدر شیخ عبدالرحمن نے کہا کہ حکومت سندھ اور صوبائی وزیر کھیل سردار محمد بخش مہر باصلاحیت کھلاڑیوں کے لیے مالی معاونت اور سرپرستی فراہم کریں تاکہ یہ مستقبل میں مزید کامیابیاں حاصل کر سکیں۔
سنگاپور میں منعقد ہونے والے سنگا کپ فٹبال ٹورنامنٹ کے 15 ویں ایڈیشن میں 13 ممالک کی 160 ٹیموں نے حصہ لیا۔ مقابلے انڈر 8، انڈر 10، انڈر 12، انڈر 14 اور انڈر 16 کی کیٹیگریز میں ہوئے جبکہ اس بار پہلی مرتبہ پیرا فٹبال مقابلے بھی شامل کیے گئے۔
تقریب میں جماعت اسلامی کے رہنما سفیان دلاور، سید جواد شعیب، جان محمد بلوچ اور زوہیب حسین بلوچ بھی شریک تھے جنہوں نے نوجوان کھلاڑیوں کی کارکردگی کو سراہا اور انہیں مستقبل کے ہیرو قرار دیا۔
