واشنگٹن – امریکی صدر ڈونلڈ ٹرمپ نے حکومتی شٹ ڈاؤن کے دوران بغیر تنخواہ خدمات انجام دینے والے ایئر ٹریفک کنٹرولرز کے لیے فی کس 10 ہزار ڈالر بونس دینے کا اعلان کر دیا۔
تفصیلات کے مطابق امریکی حکومتی شٹ ڈاؤن کے باعث لاکھوں سرکاری ملازمین کی تنخواہیں معطل ہیں، جبکہ ائر ٹریفک کنٹرولرز کی ہڑتال نے ملک بھر کے فضائی نظام کو مفلوج کر دیا ہے۔
ذرائع کے مطابق تنخواہیں نہ ملنے پر تقریباً تین ہزار ایئر ٹریفک کنٹرولرز نے کام چھوڑ دیا، جس کے نتیجے میں ہزاروں پروازیں منسوخ یا تاخیر کا شکار ہوئیں۔
صدر ٹرمپ نے ہڑتال پر شدید ناراضی کا اظہار کرتے ہوئے کہا کہ تمام ائر ٹریفک کنٹرولرز فوراً اپنی ڈیوٹی پر واپس آئیں۔
انہوں نے خبردار کیا کہ جو ملازمین واپس نہیں آئیں گے، ان کی تنخواہوں میں کٹوتی کی جائے گی۔
تاہم صدر نے ان ملازمین کے لیے انعام کا اعلان کیا جو بغیر تنخواہ حب الوطنی کے جذبے سے خدمات انجام دے رہے ہیں۔ ٹرمپ نے کہا کہ “جو ایئر ٹریفک کنٹرولرز امریکا کے لیے کام کر رہے ہیں، ان کے لیے میں فی کس 10,000 ڈالر بونس کی سفارش کروں گا۔”
صدر ٹرمپ نے ڈیموکریٹس پر الزام لگایا کہ وہ “جعلی شٹ ڈاؤن ڈرامہ” رچا کر قومی سلامتی کو خطرے میں ڈال رہے ہیں۔
انہوں نے کہا کہ “چھٹی پر جانے والے کنٹرولرز جانتے ہیں کہ انہیں جلد تنخواہیں مل جائیں گی، لیکن انہوں نے امریکا کی مدد کے لیے قدم نہیں بڑھایا۔”
انہوں نے مزید کہا، “جو لوگ کام پر واپس نہیں آنا چاہتے، وہ اپنی نوکری چھوڑ دیں۔ ان کی جگہ محب وطن امریکی جلد لے لیں گے جو جدید آلات پر بہتر کارکردگی دکھائیں گے۔”
اختتام پر ٹرمپ نے اپنے بیان میں کہا “ہمارے عظیم امریکی محب وطنوں کے لیے: خدا تمہیں برکت دے۔ میں تمہاری رقم جلد از جلد بھیجنے کی کوشش کروں گا۔ باقی سب فوراً کام پر واپس آئیں۔ خدا امریکا پر رحم کرے۔”
