صدام حسین کے نام سے مشابہت رکھنے والے صدام حسین النعیمی کی نااہلی ختم، کرکوک سے پارلیمنٹ کی نشست جیت لی
بغداد – بغداد عراق کے آزاد ہائی الیکٹورل کمیشن (IHEC) نے صدام حسین النعیمی کی نااہلی کا فیصلہ کالعدم قرار دیتے ہوئے انہیں حالیہ پارلیمانی انتخابات میں حصہ لینے کی اجازت دے دی، جس کے بعد انہوں نے کرکوک سے نشست جیت لی۔
کمیشن کے مطابق النعیمی کی نااہلی کے لیے کوئی قانونی بنیاد موجود نہیں تھی۔ وہ 800 ایسے امیدواروں میں شامل تھے جنہیں ابتدا میں انتخابی دوڑ سے باہر کیا گیا تھا۔
صدام حسین النعیمی سابق عراقی صدر صدام حسین کے نام سے مشابہت رکھنے کی وجہ سے غیر معمولی توجہ کا مرکز بنے رہے تاہم کمیشن نے واضح کیا کہ ان کا سابق حکمران سے کوئی رشتہ نہیں ہے۔ ان کی نامزدگی نے سیاسی حلقوں اور سوشل میڈیا میں خاصی بحث چھیڑ دی تھی۔
نااہلی ختم ہونے کے بعد النعیمی انتخابات میں کامیاب ہوئے اور 12 ہزار 693 ووٹ حاصل کر کے کرکوک سے نشست جیت لی، جو اس حلقے میں کسی بھی امیدوار کے لیے سب سے زیادہ ووٹ ہیں.
الیکشن کمیشن کے مطابق موجودہ وزیر اعظم محمد شیعہ السوڈانی اپنے انتخابی اتحاد کے ساتھ ملک بھر میں پہلے نمبر پر رہے، جنہیں 13 لاکھ 17 ہزار سے زائد ووٹ ملے۔ ان کے کابینہ کے 9 وزراء بھی پارلیمنٹ میں منتخب ہو گئے۔
مختلف صوبوں میں نتائج
-
بغداد میں 71 میں سے 17 اراکین اپنی نشستیں برقرار رکھنے میں کامیاب رہے۔
-
بصرہ میں 25 میں سے 11 دوبارہ منتخب ہوئے۔
-
ذی قار میں 19 میں سے 5 ارکان نے اپنی نشستیں واپس حاصل کیں۔
-
المثنی اور نجف میں صرف ایک، ایک رکن اسمبلی دوبارہ کامیاب ہوا۔
-
کربلا میں چار امیدوار دوبارہ منتخب ہوئے۔
-
بابل میں 17 میں سے پانچ امیدوار کامیاب رہے جبکہ وسیت میں دو نمایاں رہے۔
-
الانبار، جو ملک کا سب سے بڑا صوبہ ہے، وہاں چار ارکان نے دوسری مدت کے لیے نشست حاصل کی۔
انتخابی نتائج کے بعد ملک میں حکومت سازی کا پیچیدہ مرحلہ شروع ہونے والا ہے۔ اگرچہ سوڈانی نے فتح کا اعلان کیا ہے لیکن اکثریت حاصل نہ ہونے کی وجہ سے انہیں دوسری شیعہ جماعتوں کی حمایت درکار ہوگی۔
عراقی سیاست میں روایتی تقسیم کی وجہ سے سب سے بڑا پارلیمانی بلاک تشکیل دینے اور نئے وزیر اعظم کے انتخاب میں کئی ہفتے یا مہینے لگ سکتے ہیں۔
About The Author
