انقرہ میں ترک دفاعی صنعتوں کی صدارت (SSB) نے اعلان کیا ہے کہ ترکی کی مختلف دفاعی کمپنیوں نے ملک کے مربوط اور کثیر الجہتی فضائی دفاعی نظام ’اسٹیل ڈوم‘ کو مزید مضبوط بنانے کے لیے 6.5 بلین ڈالر مالیت کے معاہدوں پر دستخط کیے ہیں۔
ترکی، جو حالیہ برسوں میں اپنی دفاعی صنعت کی مقامی پیداوار بڑھا کر بیرونی انحصار کم کر رہا ہے، نے جولائی 2024 میں اسرائیل کے آئرن ڈوم طرز کے اپنے فضائی دفاعی نظام ’اسٹیل ڈوم‘ کی تیاری کے منصوبے کا اعلان کیا تھا۔ اس نظام میں 47 مختلف اجزاء شامل ہیں جن میں ریڈار، میزائل سسٹمز، الیکٹرو آپٹیکل سینسرز، کمانڈ اینڈ کنٹرول مراکز اور مختلف رینج کے فضائی دفاعی آلات شامل ہیں۔
بیان کے مطابق، خطے میں بڑھتے ہوئے خطرات، خصوصاً اسرائیل کی جانب سے مشرق وسطیٰ بھر میں کی جانے والی کارروائیوں نے ترکی کو اپنی فضائی صلاحیت بڑھانے پر مجبور کیا۔ ترکی پہلے ہی مسلح ڈرونز کا ایک اہم عالمی صنعت کار بن چکا ہے، جن کا استعمال یوکرین، شام، ناگورنو کاراباخ اور افریقہ کے متعدد ممالک میں جاری تنازعات میں کیا جاتا رہا ہے۔
ایس ایس بی کے چیئرمین ہالوک گورگن نے کہا ہے کہ نئے معاہدوں میں جنگی نظاموں اور ان کے جدید ترین ورژنز کی تیاری شامل ہے، جو مکمل طور پر مقامی طور پر تیار کیے جائیں گے۔ انہوں نے بتایا کہ یہ منصوبے ترک کمپنی روکیٹ سان (Roketsan) کے ذریعے مکمل کیے جائیں گے، جبکہ ’اسٹیل ڈوم‘ مکمل طور پر ملکی ٹیکنالوجی پر مبنی ہوگا۔
ہالوک گورگن کے مطابق یہ معاہدے ترکی کی دفاعی صلاحیت، بالخصوص فضائی دفاع اور ڈیٹرنس بڑھانے میں اہم کردار ادا کریں گے اور ملک کے جنگی نظام کی حدود اور کارکردگی میں اضافے کا باعث بنیں گے۔
About The Author
