غیر ملکی میڈیا رپورٹس کے مطابق آرمینیا نے بھارتی ساختہ تیجس لڑاکا طیارے کی ممکنہ خریداری سے انکار کر دیا ہے۔ رپورٹ میں بتایا گیا کہ دبئی ایئر شو کے دوران تیجس طیارہ گرنے کے بعد آرمینیا نے 1.2 ارب ڈالر مالیت کے 12 طیاروں کی خریداری کا فیصلہ واپس لے لیا۔ آرمینیا اس معاہدے کو حتمی شکل دینے کے مراحل میں تھا، تاہم حادثے کے بعد اس نے پیشکش قبول نہ کرنے کا فیصلہ کیا۔
دبئی ایئر شو میں چند روز قبل پیش آنے والے حادثے میں بھارتی تیجس طیارہ کرتب دکھاتے ہوئے زمین پر آ گرا تھا۔ عینی شاہدین کے مطابق طیارہ تیزی سے نیچے آیا، رن وے کے قریب زمین سے ٹکرایا اور فوری بعد آگ بھڑک اٹھی۔ حادثے میں پائلٹ کو نکلنے کا موقع نہیں مل سکا۔
بھارتی فضائیہ کے ترجمان نے حادثے میں پائلٹ کی ہلاکت کی تصدیق کرتے ہوئے کہا ہے کہ واقعے کی تحقیقات جاری ہیں۔ بھارتی میڈیا رپورٹس میں بتایا گیا ہے کہ طیارہ ونگ کمانڈر وکرم سنگھ اڑا رہے تھے جو حادثے کے نتیجے میں جان سے گئے۔
تیجس طیارے کے گرنے کے بعد دبئی ایئر شو کو عارضی طور پر معطل کر دیا گیا جبکہ طیارہ ساز کمپنی ’ہندوستان ایروناٹکس لمیٹڈ‘ کے شیئرز بھی 2.62 فیصد کمی کا شکار ہوئے۔
رپورٹس کے مطابق تکنیکی خرابیوں کے باوجود متعلقہ طیارے کو ایئر شو میں شامل کیا گیا تھا۔ حادثے سے قبل آئل لیک کی ویڈیو سوشل میڈیا پر وائرل ہونے کے باعث تیجس طیارہ پہلے ہی زیرِ بحث تھا۔
About The Author
