تل ابیب — اسرائیلی وزیرِاعظم بنجمن نیتن یاہو نے میجر جنرل رومن گوفمین کو ملک کی خفیہ بیرونی انٹیلی جنس ایجنسی موساد کا اگلا سربراہ نامزد کردیا ہے۔ گوفمین موجودہ چیف ڈیوڈ بارنیا کی جگہ ذمہ داری سنبھالیں گے جن کی پانچ سالہ مدتِ ملازمت جون 2026 میں مکمل ہورہی ہے۔
سرکاری اعلامیے کے مطابق نیتن یاہو کی جانب سے گوفمین کی تقرری کا فیصلہ منظوری کے بعد نافذ ہوگا، جس کے تحت وہ موساد کی کمان سنبھالنے کے لیے نامزد امیدوار قرار پائے ہیں۔ وزیراعظم کے دفتر نے بیان میں بتایا کہ رومن گوفمین ایک تجربہ کار اور انتہائی قابل افسر ہیں جنہوں نے بطور ملٹری سیکرٹری جنگ کے دوران شاندار کارکردگی اور فیصلہ سازی کی صلاحیت کا ثبوت دیا۔
بیان میں مزید کہا گیا کہ ان کی پیشہ ورانہ مہارت اور جدید انٹیلی جنس امور پر گرفت انہیں اس منصب کے لیے بہترین انتخاب بناتی ہے۔ موساد اسرائیل کی بیرونی کارروائیوں، خفیہ معلومات کے حصول اور علاقائی سکیورٹی حکمتِ عملی میں کلیدی کردار ادا کرتی ہے۔
ڈیوڈ بارنیا گزشتہ برسوں میں متعدد اہم انٹیلی جنس آپریشنز کی نگرانی کرچکے ہیں جبکہ نئی قیادت آنے کے بعد ادارے کی حکمت عملی اور علاقائی ترجیحات پر گہرا اثر متوقع ہے۔
About The Author
