کراچی: پاکستان آرمی نے شاندار کارکردگی کا مظاہرہ کرتے ہوئے 35ویں نیشنل گیمز کراچی کی جنرل ٹرافی اپنے نام کر لی، جبکہ پاکستان واپڈا نے دوسری اور پاکستان نیوی نے تیسری پوزیشن حاصل کی۔ صوبوں کی سطح پر پنجاب پہلے اور سندھ دوسرے نمبر پر رہا۔ نیشنل گیمز کی اختتامی تقریب آج نیشنل اسٹیڈیم کراچی میں منعقد ہو گی، جہاں گیمز کے باقاعدہ اختتام کا اعلان کیا جائے گا۔
فٹبال ایونٹ: پی اے ایف نے ٹائٹل جیت لیا
نیشنل گیمز کے آخری روز فٹبال ایونٹ کے فائنل میں پاکستان ایئر فورس (پی اے ایف) نے پاکستان آرمی کو شکست دے کر ٹائٹل اپنے نام کیا۔ واپڈا نے تیسری جبکہ پاکستان نیوی نے چوتھی پوزیشن حاصل کی۔ فائنل کے موقع پر پاکستان فٹبال فیڈریشن کے رکن کانگریس اور فیفا ریفری احمد رؤف بھی موجود تھے۔
باکسنگ: آرمی کی مکمل اجارہ داری
باکسنگ مقابلوں میں پاکستان آرمی نے مردوں اور خواتین دونوں کیٹیگریز میں واضح برتری حاصل کرتے ہوئے مجموعی طور پر 12 گولڈ میڈلز جیت کر ایونٹ اپنے نام کیا۔
-
مردوں میں آرمی نے 5 گولڈ اور 4 سلور
-
خواتین میں 7 گولڈ اور 1 سلور میڈل حاصل کر کے جنرل ٹرافی جیت لی
نیوی مردوں میں 3 گولڈ، 2 سلور اور 2 برانز کے ساتھ دوسرے جبکہ واپڈا 2 گولڈ، 2 سلور اور 3 برانز کے ساتھ تیسرے نمبر پر رہی۔
کراٹے ایونٹ: آرمی کی شاندار کامیابی
پاکستان آرمی نے 10 گولڈ میڈلز کے ساتھ کراٹے ایونٹ جیت لیا۔
-
مردوں میں آرمی کے کراٹیکاز نے 6 گولڈ اور 2 سلور
-
خواتین میں 4 گولڈ، 3 سلور اور 1 برانز میڈل حاصل کیے
خواتین کے مقابلوں میں پنجاب دوسرے، بلوچستان تیسرے، سندھ چوتھے اور واپڈا پانچویں نمبر پر رہا۔
شوٹنگ: آرمی اور نیوی میں سخت مقابلہ
شوٹنگ ایونٹ میں پاکستان آرمی نے 17 گولڈ، 16 سلور اور 5 برانز میڈلز کے ساتھ پہلی پوزیشن حاصل کی، جبکہ نیوی نے 15 گولڈ، 12 سلور اور 13 برانز کے ساتھ دوسری پوزیشن حاصل کی۔
پی اے ایف نے 3 سلور اور 8 برانز، سندھ نے ایک گولڈ اور دو سلور جبکہ ایچ ای سی نے چار برانز میڈلز جیتے۔
بیس بال، بیڈمنٹن اور ہاکی کے نتائج
-
مینز بیس بال ایونٹ میں پاکستان آرمی نے واپڈا کو شکست دے کر ٹائٹل جیت لیا
-
خیبرپختونخوا نے پنجاب کو ہرا کر تیسری پوزیشن حاصل کی
-
بیڈمنٹن میں واپڈا کے عرفان سعید اور ماحور شہزاد نے مینز اور ویمنز سنگلز ٹائٹل جیتے
-
آرمی کے راجا حسنین اور عمارہ اشتیاق نے ڈبل کراؤن مکمل کیا
-
ہاکی مینز کا ٹائٹل پاکستان آرمی اور ویمنز کا ٹائٹل واپڈا کے نام رہا
ویمنز ہاکی فائنل میں واپڈا نے پنجاب کو 2-1 سے شکست دے کر گولڈ میڈل حاصل کیا۔
تھرو بال کے نمائشی مقابلے
نیشنل گیمز کے موقع پر تھرو بال کے نمائشی مقابلوں کا آغاز بھی کیا گیا، جس کا افتتاح سیکرٹری کلچر و سیاحت خیر محمد کلوڑ نے کیا۔ تقریب میں پاکستان تھرو بال فیڈریشن اور پاکستان کیچ بال فیڈریشن کے عہدیداران بھی شریک تھے۔
اختتامی تقریب
نیشنل گیمز کی فائنل اور اختتامی تقریب کے مہمان خصوصی پاکستان اولمپک ایسوسی ایشن کے صدر عارف سعید تھے، جنہوں نے پاکستان ہاکی فیڈریشن کے سیکریٹری رانا مجاہد علی خان کے ہمراہ کامیاب کھلاڑیوں میں میڈلز اور انعامات تقسیم کیے۔
About The Author
