کوکس بازار: پاکستان ویمنز انڈر 19 کرکٹ ٹیم نے شاندار کم بیک کرتے ہوئے بنگلہ دیش ویمنز انڈر 19 کو پانچویں اور فیصلہ کن ٹی20 میچ میں 6 وکٹوں سے شکست دے کر سیریز 3-2 سے اپنے نام کر لی۔ کوکس بازار اکیڈمی گراؤنڈ میں کھیلے گئے میچ میں قومی ٹیم نے 85 رنز کا ہدف تین اوور پہلے حاصل کر کے یادگار کامیابی سمیٹی۔
پاکستان نے ٹاس جیت کر پہلے فیلڈنگ کا فیصلہ کیا جو درست ثابت ہوا، کیونکہ قومی بولرز نے میزبان ٹیم کی بیٹنگ لائن کو مکمل طور پر بے اثر کر کے بنگلہ دیش کو 84 رنز تک محدود کر دیا۔ بنگلہ دیش کی ٹیم محض 8 اوورز میں 31 رنز پر 5 وکٹیں گنوا بیٹھی اور آغاز ہی سے دباؤ میں نظر آئی۔
بنگلہ دیش کی جانب سے واحد نمایاں کارکردگی صادیہ اختر نے دکھائی، جنہوں نے نمبر 6 پر بیٹنگ کرتے ہوئے 28 گیندوں پر 27 رنز اسکور کیے، جبکہ ان کے علاوہ کوئی بھی بیٹر ڈبل فگر میں داخل نہ ہو سکی۔
پاکستان کی بولنگ میں بریرہ سیف نے شاندار کارکردگی کا مظاہرہ کرتے ہوئے 4 اوورز میں 16 رنز دے کر 3 اہم وکٹیں حاصل کیں۔ ان کی اسی عمدہ کارکردگی پر انہیں پلیئر آف دی میچ قرار دیا گیا۔
دیگر بولرز میں روزینہ اکرم نے بھی مؤثر بولنگ کی اور سیریز میں مجموعی طور پر 8 وکٹوں کے ساتھ میمونہ خالد کے ہمراہ مشترکہ طور پر تیسری پوزیشن حاصل کی۔ اقصیٰ حبیب، میمونہ خالد اور شہر بانو نے ایک ایک وکٹ حاصل کی۔
ہدف کے تعاقب میں پاکستان کو اگرچہ ابتدا میں مشکلات کا سامنا کرنا پڑا اور صرف 16 رنز پر کپتان ایمان نصیر اور راحمہ سید آؤٹ ہو گئیں، تاہم بعد میں مڈل آرڈر بیٹرز نے ذمہ دارانہ بیٹنگ کرتے ہوئے ٹیم کو سنبھالا دیا۔ ایمان نصیر نے سیریز میں مجموعی طور پر 97 رنز بنا کر ٹاپ اسکورر رہنے کا اعزاز حاصل کیا اور انہیں پلیئر آف دی سیریز قرار دیا گیا۔
تیسری وکٹ پر کومل خان اور اقصیٰ حبیب نے 37 رنز کی قیمتی شراکت قائم کی۔ اقصیٰ حبیب نے 23 گیندوں پر 21 رنز بنائے جبکہ کومل خان نے 46 گیندوں پر 25 رنز کی محتاط اننگز کھیلی۔
اختتامی لمحات میں فضا فیاض نے جارحانہ انداز اپناتے ہوئے 14 گیندوں پر 18 رنز (ایک چھکا اور ایک چوکا) بنا کر ٹیم کو فتح کے دہانے تک پہنچایا اور ناٹ آؤٹ رہیں، جبکہ عریشہ انصاری 7 رنز بنا کر ناقابلِ شکست رہیں۔ پاکستان نے ہدف 17 اوورز میں 4 وکٹوں کے نقصان پر حاصل کر لیا۔
واضح رہے کہ پاکستان ٹیم نے ابتدائی تین میچز کے بعد سیریز میں 2-1 سے پیچھے ہونے کے باوجود مسلسل دو میچز جیت کر شاندار کم بیک کیا اور نوجوان کھلاڑیوں نے دباؤ میں بہترین اعصاب کا مظاہرہ کرتے ہوئے سیریز اپنے نام کی۔
یہ کامیابی پاکستان ویمنز انڈر 19 کرکٹ کے لیے ایک اہم سنگِ میل قرار دی جا رہی ہے، جو مستقبل میں عالمی سطح پر بہتر کارکردگی کے امکانات کو مزید مضبوط کرتی ہے۔
About The Author
