لاہور : چیئرمین پاکستان کرکٹ بورڈ محسن نقوی نے بیرونِ ملک نمایاں کارکردگی دکھانے والے پاکستانی کھلاڑیوں کو ملک کا فخر قرار دیتے ہوئے کہا ہے کہ جب قومی کھلاڑی عالمی سطح پر ریکارڈ قائم کرتے ہیں تو نہ صرف پاکستان کا نام روشن ہوتا ہے بلکہ نوجوان نسل کے لیے حوصلہ اور ترغیب کا باعث بھی بنتے ہیں۔ انہوں نے سلطان گولڈن کی جانب سے ورلڈ ریکارڈ قائم کرنے کو پاکستان کے لیے ایک قابلِ فخر کارنامہ قرار دیا۔
اپنے جاری کردہ بیان میں چیئرمین پی سی بی نے کہا کہ سلطان گولڈن نے عالمی مقابلے میں شاندار کارکردگی کا مظاہرہ کرتے ہوئے سبز ہلالی پرچم ایک بار پھر بلند کیا ہے، جو پوری قوم کے لیے خوشی اور فخر کا باعث ہے۔ ان کا کہنا تھا کہ سلطان گولڈن نہ صرف اپنی محنت اور لگن سے کامیابی حاصل کر رہے ہیں بلکہ وہ پاکستان کے دیگر کھلاڑیوں کے لیے رول ماڈل کا کردار بھی ادا کر رہے ہیں۔
محسن نقوی نے کہا کہ ایسے کھلاڑی نوجوانوں کو یہ پیغام دیتے ہیں کہ محنت، نظم و ضبط اور مستقل مزاجی کے ذریعے عالمی سطح پر بھی پاکستان کا نام روشن کیا جا سکتا ہے۔ انہوں نے مزید کہا کہ پاکستان اس وقت کھیلوں سمیت دیگر شعبوں میں بھی نمایاں کامیابیاں سمیٹ رہا ہے، جو اس بات کا ثبوت ہے کہ قومی ٹیلنٹ کسی سے کم نہیں۔
چیئرمین پی سی بی نے سلطان گولڈن کے لیے نیک تمناؤں کا اظہار کرتے ہوئے امید ظاہر کی کہ وہ آئندہ بھی اسی جذبے اور عزم کے ساتھ پاکستان کے لیے مزید اعزازات حاصل کریں گے اور عالمی سطح پر ملک کی مثبت شناخت کو مزید مضبوط بنائیں گے۔
About The Author
