مکہ مکرمہ — مسجد الحرام اور مسجد نبوی ﷺ میں بچوں کی حفاظت کو یقینی بنانے کے لیے سعودی حکام نے خصوصی سیفٹی رِسٹ بینڈز متعارف کر دیے ہیں۔ جنرل اتھارٹی برائے امور حرمین شریفین کے تحت یہ اقدامات زائرین اور بچوں کی حفاظت کو بڑھانے کے لیے کیے گئے ہیں۔
نئے رِسٹ بینڈز میں والدین یا سرپرست کے رابطے کی تفصیلات درج ہوں گی تاکہ بچے گم ہونے یا الگ ہونے کی صورت میں فوری شناخت اور رابطہ ممکن ہو سکے۔ اس اقدام کا مقصد ہنگامی صورتحال میں عملے کو بروقت مدد فراہم کرنا اور حرمین شریفین میں نظم و ضبط کو مزید بہتر بنانا ہے۔
گلف میڈیا کے مطابق، یہ رِسٹ بینڈز اہم داخلی دروازوں جیسے باب عبدالعزیز اور باب فہد (گیٹ نمبر 79) پر دستیاب ہیں، جہاں مخصوص عملہ والدین اور سرپرستوں کو رابطہ کی معلومات رجسٹر کرانے میں مدد فراہم کرے گا۔
سعودی حکام نے زائرین اور سرپرستوں پر زور دیا ہے کہ وہ خاص طور پر عمرہ اور حج کے مصروف ادوار میں اس سہولت سے بھرپور فائدہ اٹھائیں تاکہ بچوں کی حفاظت یقینی بنائی جا سکے۔
About The Author
