برلن — یورپی رہنماؤں نے اعلان کیا ہے کہ مستقبل میں یوکرین میں سیکیورٹی ضمانتوں اور امریکی اعانت کے تحت ایک کثیرالاقوامی امن فوج تعینات کی جائے گی، جس کا مقصد جنگ کے خاتمے کے بعد امن معاہدے پر مؤثر عمل درآمد کو یقینی بنانا اور روس کی جانب سے کسی ممکنہ خلاف ورزی کو روکنا ہوگا۔
غیر ملکی میڈیا رپورٹس کے مطابق امریکا، نیٹو اور یورپی یونین کی قیادت کے ہمراہ دس اہم یورپی ممالک کے رہنماؤں نے برلن میں یوکرین کے صدر ولادیمیر زیلنسکی سے ملاقات کے بعد ایک مشترکہ دستخط شدہ بیان جاری کیا۔ بیان میں یوکرین کی طویل المدتی سلامتی کے لیے جامع حکمتِ عملی کا خاکہ پیش کیا گیا۔
مشترکہ اعلامیے میں کہا گیا ہے کہ یوکرین میں مجوزہ کثیرالاقوامی امن فوج کی تعیناتی امریکا اور یورپ کی بڑی اور طاقتور ریاستوں کی جانب سے دی جانے والی سیکیورٹی ضمانتوں کا حصہ ہوگی۔ یورپی رہنماؤں کے مطابق ایسی مضبوط ضمانتیں اس امر کو یقینی بنائیں گی کہ جنگ کے خاتمے کے بعد روس مستقبل میں کسی معاہدے کی خلاف ورزی نہ کر سکے۔
بیان میں مزید واضح کیا گیا ہے کہ یوکرین کو زمانۂ امن میں کم از کم آٹھ لاکھ نفوس پر مشتمل ایک مضبوط فوج برقرار رکھنی چاہیے، جسے یورپی ممالک کی سیاسی، عسکری اور تکنیکی حمایت حاصل رہے گی۔ اس فوج کا مقصد یوکرین کے دفاع کو خود کفیل بنانا اور خطے میں طاقت کا توازن برقرار رکھنا ہوگا۔
اعلامیے کے مطابق یوکرین کی سلامتی کی ضمانتوں میں امریکا کی قیادت میں قائم کیا جانے والا ایک جنگ بندی مکینزم بھی شامل ہوگا۔ اس مکینزم کا بنیادی کام کسی بھی ممکنہ حملے یا معاہدے کی خلاف ورزی کی صورت میں بروقت پیشگی اطلاع دینا اور فوری ردِعمل کو ممکن بنانا ہوگا۔
دوسری جانب امریکی صدر کے خصوصی ایلچی اسٹیو وٹکوف نے بھی اس بات کی تصدیق کی ہے کہ یوکرین۔روس جنگ بندی مذاکرات میں پیش رفت ہوئی ہے اور فریقین کے درمیان سفارتی رابطے مسلسل جاری ہیں۔
یورپی رہنماؤں کے مطابق یہ اقدامات نہ صرف یوکرین کے لیے پائیدار امن کی بنیاد رکھیں گے بلکہ یورپی سلامتی کے مجموعی ڈھانچے کو بھی مستحکم کرنے میں اہم کردار ادا کریں گے۔
About The Author
