تولوکا — میکسیکو کے شہر تولوکا میں ایک چھوٹا نجی طیارہ ہنگامی لینڈنگ کی کوشش کے دوران گر کر تباہ ہو گیا، جس کے نتیجے میں کم از کم 7 افراد ہلاک ہو گئے۔
میکسیکو اسٹیٹ کے سول پروٹیکشن حکام کے مطابق طیارہ اکاپولکو سے تولوکا کے لیے روانہ ہوا تھا۔ طیارے میں 8 مسافر اور 2 عملے کے ارکان سوار تھے۔ دورانِ پرواز تکنیکی خرابی کے باعث پائلٹ نے ہنگامی لینڈنگ کی کوشش کی۔
خبر رساں اداروں کے مطابق طیارہ ایک فٹبال گراؤنڈ پر اترنے کی کوشش کر رہا تھا کہ قریبی گودام کی چھت سے ٹکرا گیا، جس کے بعد طیارے میں شدید آگ بھڑک اٹھی اور وہ مکمل طور پر تباہ ہو گیا۔
ریسکیو حکام نے ملبے سے اب تک 7 افراد کی لاشیں نکال لی ہیں جبکہ امدادی کارروائیاں جاری ہیں۔ زخمیوں یا ممکنہ زندہ بچ جانے والوں کی تلاش کے لیے جائے حادثہ پر فائر بریگیڈ، ایمبولینسز اور دیگر ہنگامی ادارے موجود ہیں۔
حکام کے مطابق حادثے کی وجوہات جاننے کے لیے تحقیقات کا آغاز کر دیا گیا ہے، جبکہ طیارے کے بلیک باکس اور تکنیکی ریکارڈ کا بھی جائزہ لیا جا رہا ہے۔ سول پروٹیکشن اداروں کا کہنا ہے کہ حتمی رپورٹ آنے کے بعد ہی حادثے کی اصل وجہ سامنے آ سکے گی۔
About The Author
