دبئی — انڈر 19 ایشیا کپ کے ایک اہم اور فیصلہ کن میچ میں پاکستان نے متحدہ عرب امارات کو 70 رنز سے شکست دے کر سیمی فائنل کے لیے کوالیفائی کر لیا۔ یہ میچ آئی سی سی کرکٹ اکیڈمی دبئی میں کھیلا گیا جہاں پاکستانی ٹیم نے شاندار آل راؤنڈ کارکردگی کا مظاہرہ کیا۔
پاکستان کی جانب سے دیے گئے 242 رنز کے ہدف کے تعاقب میں یو اے ای کی ٹیم 37.5 اوورز میں 171 رنز بنا کر آؤٹ ہو گئی۔ یو اے ای کے لیے آیان مصباح نے سب سے زیادہ 77 رنز کی مزاحمتی اننگز کھیلی، تاہم دیگر بیٹرز خاطر خواہ ساتھ نہ دے سکے۔ پرتھوی مادھو 27، یاین رائے 13، محمد ریان 12 اور ادش سوری 8 رنز بنا سکے۔
پاکستانی بولرز نے نظم و ضبط کا مظاہرہ کرتے ہوئے حریف بیٹنگ لائن کو دباؤ میں رکھا۔ عبدالسبحان نے شاندار بولنگ کرتے ہوئے 4 وکٹیں حاصل کیں، جبکہ محمد صیام، مومن قمر اور احمد حسین نے ایک ایک کھلاڑی کو پویلین کی راہ دکھائی۔
اس سے قبل پاکستان نے ٹاس جیت کر پہلے بیٹنگ کا فیصلہ کیا اور مقررہ 50 اوورز میں 9 وکٹوں کے نقصان پر 241 رنز بنائے۔ احمد حسین 65 رنز کے ساتھ ٹاپ اسکورر رہے، سمیر منہاس نے 44 جبکہ حمزہ ظہور نے 42 رنز کی اہم اننگز کھیلی۔ ان بلے بازوں کی ذمہ دارانہ بیٹنگ نے پاکستان کو ایک مضبوط مجموعی اسکور تک پہنچایا۔
یو اے ای کی جانب سے یوگ شرما نے 3 اور نسیم خان نے 2 وکٹیں حاصل کیں، تاہم پاکستانی بیٹنگ لائن نے مجموعی طور پر بہتر کارکردگی دکھائی۔
اس کامیابی کے ساتھ پاکستان نے سیمی فائنل کے لیے کوالیفائی کر لیا ہے۔ گروپ اے سے بھارت جبکہ گروپ بی سے سری لنکا اور بنگلہ دیش پہلے ہی آخری چار ٹیموں میں جگہ بنا چکے ہیں۔ پاکستان کی یہ فتح ایونٹ کے سیمی فائنلز کو مزید دلچسپ بنا دے گی۔
About The Author
