واشنگٹن — امریکی صدر ڈونلڈ ٹرمپ نے کہا ہے کہ غزہ سٹیبلائزیشن فورس پہلے سے ہی فعال ہے اور آئندہ مرحلے میں مزید ممالک کو بھی اس میں شامل کیا جائے گا۔ اردو نیوز کے مطابق صدر ٹرمپ نے اوول آفس میں صحافیوں سے گفتگو کرتے ہوئے کہا کہ ان کے خیال میں یہ فورس تشکیل پا چکی ہے اور عملی طور پر کام کر رہی ہے۔
صدر ٹرمپ کا کہنا تھا کہ زیادہ سے زیادہ ممالک اس سٹیبلائزیشن فورس کا حصہ بن رہے ہیں اور جو ممالک شامل ہوں گے، وہ ضرورت کے مطابق فوجی دستے تعینات کریں گے۔ انہوں نے کہا کہ یہ ایک کثیرالاقوامی کوشش ہے جس کا مقصد غزہ میں استحکام پیدا کرنا اور جنگ بندی کو مؤثر بنانا ہے۔
امریکی صدر نے اس موقع پر یہ بھی بتایا کہ امریکی انتظامیہ اس معاملے کا جائزہ لے رہی ہے کہ آیا اسرائیل نے ہفتے کے روز فلسطینی عسکریت پسند تنظیم کے ایک رہنما کو ہدف بنا کر غزہ جنگ بندی معاہدے کی خلاف ورزی کی ہے یا نہیں۔ ان کے مطابق اس حوالے سے تمام دستیاب معلومات کا بغور تجزیہ کیا جا رہا ہے۔
واضح رہے کہ غزہ سٹیبلائزیشن فورس غزہ میں جنگ بندی اور بعد از جنگ نظم و نسق کے لیے صدر ٹرمپ کی جانب سے پیش کیے گئے منصوبے کا ایک اہم جزو ہے۔ اس فورس کا مقصد جنگ بندی کے نفاذ، سکیورٹی کی صورتحال کو مستحکم رکھنے اور ممکنہ کشیدگی کو دوبارہ بھڑکنے سے روکنا بتایا جا رہا ہے۔ مبصرین کے مطابق اس منصوبے میں عالمی شراکت داری اور علاقائی طاقتوں کی شمولیت کو کلیدی اہمیت حاصل ہے۔
About The Author
