بلومبرگ کی 2025ء کی فہرست جاری: والٹن خاندان دنیا کا امیر ترین، عرب دنیا کے تین شاہی خاندان ٹاپ فور میں شامل
بلومبرگ نے 2025ء کے عالمی امیر ترین خاندانوں کی فہرست جاری کر دی ہے، جس کے مطابق دنیا کے 25 امیر ترین خاندانوں کی مجموعی دولت 2.9 ٹریلین ڈالر تک پہنچ چکی ہے۔ رپورٹ میں انکشاف کیا گیا ہے کہ صرف ایک سال کے دوران ان خاندانوں کی دولت میں 358.7 ارب ڈالر کا اضافہ ہوا، جو عالمی سطح پر دولت کے ارتکاز کی واضح عکاسی کرتا ہے۔
بلومبرگ کے مطابق امریکی ریٹیل جائنٹ والمارٹ کے مالکان والٹن خاندان ایک بار پھر دنیا کا امیر ترین خاندان قرار پایا ہے۔ فہرست میں والٹن خاندان 513.4 ارب ڈالر کی مجموعی دولت کے ساتھ پہلے نمبر پر موجود ہے، جو دیگر تمام خاندانوں کے مقابلے میں نمایاں برتری رکھتا ہے۔
رپورٹ میں بتایا گیا ہے کہ عرب دنیا کے تین شاہی خاندان بھی عالمی امیر ترین خاندانوں کی فہرست میں نمایاں مقام حاصل کرنے میں کامیاب رہے ہیں۔ متحدہ عرب امارات کے دارالحکومت ابوظہبی کا آل نہیان خاندان 335.9 ارب ڈالر کی مجموعی دولت کے ساتھ دنیا کا دوسرا امیر ترین خاندان قرار دیا گیا ہے۔
سعودی عرب کا شاہی آل سعود خاندان دولت کے لحاظ سے دنیا میں تیسرے نمبر پر موجود ہے، جس کی مجموعی دولت 213.6 ارب ڈالر تک پہنچ چکی ہے۔ قطر کا شاہی آل ثانی خاندان اس فہرست میں چوتھے نمبر پر ہے، جو خلیجی خطے کی بڑھتی ہوئی معاشی طاقت کو ظاہر کرتا ہے۔
بلومبرگ کی رپورٹ میں اس امر پر بھی زور دیا گیا ہے کہ عالمی دولت کا ایک بڑا حصہ چند محدود خاندانوں کے پاس مرتکز ہوتا جا رہا ہے، جس سے معاشی عدم مساوات میں اضافے کے خدشات پیدا ہو رہے ہیں۔ ماہرین کے مطابق یہ رجحان مستقبل میں عالمی معیشت، سیاست اور سماجی ڈھانچوں پر گہرے اثرات مرتب کر سکتا ہے۔
یہ فہرست نہ صرف دنیا کے طاقتور مالیاتی خاندانوں کی نشاندہی کرتی ہے بلکہ اس حقیقت کو بھی اجاگر کرتی ہے کہ عالمی دولت کی تقسیم کس حد تک عدم توازن کا شکار ہو چکی ہے۔
About The Author
