ابوجا — نائجیریا میں سیکیورٹی فورسز نے ایک بڑی کارروائی کے دوران اسکول سے اغوا کیے گئے مزید 130 بچوں کو کامیابی کے ساتھ بازیاب کرا لیا ہے، جس کے بعد تمام مغوی طلبہ کی رہائی مکمل ہو گئی ہے۔
خبر ایجنسی کے مطابق کیتھولک اسکول سے اغوا ہونے والے بچوں کو بحفاظت آزاد کرا لیا گیا ہے۔ نائجیریا کے صدارتی ترجمان نے اس پیش رفت کی تصدیق کرتے ہوئے کہا ہے کہ اب کوئی بھی طالب علم اغوا کاروں کی قید میں نہیں ہے۔
واضح رہے کہ گزشتہ ماہ نومبر میں مسلح افراد نے سینٹ میری بورڈنگ اسکول پر حملہ کر کے بڑی تعداد میں بچوں کو اغوا کر لیا تھا۔ اس سے قبل سیکیورٹی فورسز کی کارروائیوں کے نتیجے میں 100 مغوی بچوں کو بازیاب کرایا جا چکا تھا، جبکہ حالیہ کارروائی کے بعد باقی ماندہ تمام بچوں کو بھی رہا کرا لیا گیا ہے۔
دوسری جانب اقوام متحدہ نے نائجیریا میں اغوا کی بڑھتی ہوئی وارداتوں پر شدید تشویش کا اظہار کیا ہے۔ عالمی ادارے نے اس بات کی بھی تصدیق کی ہے کہ اغوا کیے گئے تمام بچے اب آزاد ہو چکے ہیں۔
ماہرین کے مطابق نائجیریا میں تعلیمی اداروں کو نشانہ بنانے کے واقعات سیکیورٹی چیلنجز کو اجاگر کرتے ہیں، تاہم حالیہ کامیاب کارروائی کو قانون نافذ کرنے والے اداروں کی ایک اہم کامیابی قرار دیا جا رہا ہے۔
About The Author
