کینبرا — بگ بیش ٹی ٹوئنٹی لیگ (بی بی ایل) میں پاکستانی فاسٹ بولر حارث رؤف کی شاندار کارکردگی کی بدولت میلبرن اسٹارز نے شاداب خان کی نمائندگی کرنے والی سڈنی تھنڈرز کو 9 وکٹوں سے باآسانی شکست دے دی۔
کینبرا میں کھیلے گئے میچ میں حارث رؤف نے تباہ کن باؤلنگ کا مظاہرہ کرتے ہوئے 29 رنز کے عوض 3 وکٹیں حاصل کیں، جس پر انہیں پلیئر آف دی میچ قرار دیا گیا۔ سڈنی تھنڈرز کی ٹیم پہلے بیٹنگ کرتے ہوئے مقررہ اوورز کی آخری گیند پر 128 رنز بنا کر آؤٹ ہوگئی۔
سڈنی تھنڈرز کی جانب سے کپتان شاداب خان نے سب سے زیادہ 25 رنز اسکور کیے، جبکہ میتھیو جائکس نے 24 اور سیم بلنگز نے 23 رنز بنائے۔ میلبرن اسٹارز کی باؤلنگ لائن میں مچل ویپسن، پیٹر سڈل اور مارکوس اسٹوئنس نے بھی مؤثر باؤلنگ کرتے ہوئے دو، دو وکٹیں حاصل کیں۔
جوابی اننگز میں میلبرن اسٹارز نے ہدف نہایت سہولت کے ساتھ محض 14 اوورز میں ایک وکٹ کے نقصان پر حاصل کر لیا۔ کلارک 60 رنز کے ساتھ نمایاں بلے باز رہے، جبکہ گلین میکسویل نے 20 گیندوں پر جارحانہ 39 رنز بنائے۔ سیم ہارپر 29 رنز پر ناقابل شکست رہے۔
اس فتح کے ساتھ میلبرن اسٹارز نے پوائنٹس ٹیبل پر اپنی پوزیشن مضبوط کر لی جبکہ سڈنی تھنڈرز کو ٹورنامنٹ میں ایک اور ناکامی کا سامنا کرنا پڑا۔
About The Author
