اسکاٹ لینڈ — پاکستان کی انڈر 15 اسکواش ٹیم نے ایک اور عالمی اعزاز جیت کر ملک کا نام روشن کر دیا۔ قومی کھلاڑی محمد سہیل عدنان نے شاندار کارکردگی کا مظاہرہ کرتے ہوئے فائنل میں چین کے یوان شی کو اسٹریٹ سیٹس میں شکست دے کر ٹائٹل اپنے نام کر لیا۔
تفصیلات کے مطابق محمد سہیل عدنان نے فائنل میں چینی حریف کو 11-7، 11-9 اور 11-7 سے شکست دی اور پورے ٹورنامنٹ میں اپنی برتری ثابت کی۔ اس کامیابی کے ساتھ پاکستان کا قومی پرچم ایک بار پھر عالمی سطح پر بلند ہوا۔
یہ سہیل عدنان کا پہلا بڑا اعزاز نہیں ہے۔ وہ اس سے قبل جنوبی کوریا میں منعقد ہونے والی 32ویں ایشین انڈر 13 جونیئر اسکواش چیمپئن شپ کے چیمپئن بھی رہ چکے ہیں۔ ایشین جونیئر اسکواش مقابلوں میں بھی انہوں نے نمایاں کارکردگی دکھاتے ہوئے بھارت کے ابھاد سنگھ کو شکست دی تھی۔
موجودہ ٹورنامنٹ کے کوارٹر فائنل میں بھی سہیل عدنان نے بھارتی کھلاڑی ابھاد سنگھ کو 11-3، 11-9، 11-4 سے شکست دے کر سیمی فائنل میں رسائی حاصل کی تھی۔
ماہرین کے مطابق سہیل عدنان کی یہ کامیابی پاکستان میں اسکواش کے روشن مستقبل کی علامت ہے اور یہ ثابت کرتی ہے کہ نئی نسل کے کھلاڑی عالمی سطح پر مقابلہ کرنے کی بھرپور صلاحیت رکھتے ہیں۔
About The Author
