سڈنی – ایشیز سیریز کے آخری ٹیسٹ میچ کے پہلے روز کھیل کے آغاز سے قبل سڈنی کے ساحل پر پیش آنے والے فائرنگ کے افسوسناک واقعے کے ہیروز کو شاندار خراجِ تحسین پیش کیا گیا۔
انگلینڈ اور آسٹریلیا کے درمیان جاری ٹیسٹ میچ کے دوران سڈنی کرکٹ گراؤنڈ (ایس سی جی) میں متاثرین سے اظہارِ یکجہتی کیا گیا، جہاں بڑی اسکرین پر پیغام درج تھا کہ “اس مشکل گھڑی میں ہم آپ کے ساتھ ہیں۔”
اس موقع پر اسٹیڈیم میں موجود شائقینِ کرکٹ نے کھڑے ہو کر ہیروز کا استقبال کیا، جبکہ انہیں گارڈ آف آنر پیش کیا گیا۔ گارڈ آف آنر میں آئی سی یو پیرا میڈک اسٹاف، ڈاکٹرز، مقامی پولیس اور سیکیورٹی اہلکاروں نے شرکت کی، جبکہ دونوں ٹیموں کے کھلاڑی بھی اس باوقار تقریب کا حصہ بنے۔
تقریب کے دوران سڈنی فائرنگ واقعے میں درجنوں جانیں بچانے والے ہیرو احمد الحمد کو خصوصی طور پر سراہا گیا۔ ان کے ہمراہ 14 سالہ چایا ڈینڈن بھی موجود تھیں، جو واقعے کے دوران دو بچوں کو بچانے کی کوشش میں ٹانگ میں گولی لگنے کے باوجود بہادری سے ڈٹی رہیں۔
آسٹریلوی کھلاڑی عثمان خواجہ سمیت دیگر کھلاڑیوں نے احمد الحمد سے ملاقات کی اور ان کی جرأت و حوصلے کو خراجِ تحسین پیش کیا۔ اسٹیڈیم میں موجود تماشائیوں نے بھی تالियों سے ہیروز کا شکریہ ادا کیا۔
قومی ترانوں کے بعد نیو ساؤتھ ویلز کے وزیرِ کھیل اور کرکٹ آسٹریلیا کے چیف ایگزیکٹو آفیسر نے ہیروز سے ملاقات کی اور ان کی خدمات پر اظہارِ تشکر کیا۔
واضح رہے کہ 14 دسمبر کو سڈنی کے ساحل پر فائرنگ کا افسوسناک واقعہ پیش آیا تھا، جس میں 15 افراد ہلاک ہو گئے تھے، جبکہ متعدد زخمی ہوئے تھے۔
About The Author
