مسقط — عمان میں کرایہ داروں اور مالکانِ مکان کے حقوق کو منظم کرنے کے لیے کرایہ داری سے متعلق نیا قانون نافذ کر دیا گیا ہے، جس پر تمام رہائشی، تجارتی اور صنعتی جائیدادوں کے مالکان کے لیے عمل کرنا لازم ہوگا۔ اس قانون کے تحت کرایہ داری تنازعات کے حل کے لیے ایک جامع ڈیجیٹل اور کمپیوٹرائزڈ نظام متعارف کرایا گیا ہے۔
عمان کی وزارتِ داخلہ کے مطابق کرایہ داری تنازعات کے حل کے لیے نئے کمپیوٹرائزڈ قواعد و ضوابط نافذ کر دیے گئے ہیں، جن کا مقصد عدالتی کارروائی کو تیز، شفاف اور مؤثر بنانا ہے، جبکہ ڈیجیٹل سرکاری خدمات کے دائرہ کار میں بھی توسیع کی جا رہی ہے۔
وزارت کی جانب سے جاری فیصلے کے تحت مالکان اور کرایہ داروں کے درمیان پیدا ہونے والے تنازعات کو اب ایک باضابطہ ڈیجیٹل فریم ورک کے تحت نمٹایا جائے گا۔ یہ نظام کرایہ داری کے قوانین، دیوانی و تجارتی طریقۂ کار، قانونِ شہادت اور لین دین سے متعلق موجودہ قانونی ڈھانچے کی بنیاد پر ترتیب دیا گیا ہے۔
نئے ضوابط کے مطابق کرایہ داری تنازعات سے متعلق درخواستیں آن لائن اور کمپیوٹرائزڈ طریقے سے کرایہ داری تنازعات کی کمیٹی کو جمع کرائی جائیں گی، جن کے ساتھ تمام قانونی معاون دستاویزات فراہم کرنا لازم ہوگا۔ درخواست گزار کو تمام فریقین کی مکمل رابطہ تفصیلات، بشمول فون نمبر اور ای میل ایڈریسز، اور مقررہ سرکاری فیس کی ادائیگی کا ثبوت بھی جمع کرانا ہوگا۔
فیصلے کے تحت کمیٹی کے چیئرمین کی اجازت کے بغیر کسی بھی مقدمے سے متعلق دستاویزات تک رسائی، ان کی ترسیل یا نقول بنانے کی اجازت نہیں ہوگی، جبکہ عدالتی کارروائی کو فریقین کے دستخط کے بغیر الیکٹرانک منٹس میں محفوظ کیا جائے گا۔
ضابطے کے مطابق کمیٹی کا سیکریٹری درخواست موصول ہونے کے بعد اسے کمپیوٹر ڈیٹا میں درج کرے گا اور سات دن کے اندر سماعت کے شیڈول کے لیے چیئرمین کو ارسال کرے گا۔ فریقین کو سماعت کی تاریخ سے متعلق اطلاع ای میل کے ذریعے دی جائے گی، جبکہ ای میل ممکن نہ ہونے کی صورت میں قانون کے مطابق متبادل طریقہ اختیار کیا جائے گا۔
اگرچہ بنیادی طریقۂ کار ڈیجیٹل ہوگا، تاہم کمیٹی کے چیئرمین کو اختیار حاصل ہوگا کہ ضرورت پڑنے پر فریقین کو ذاتی طور پر طلب کر سکے۔ اسی طرح فریقین بھی الیکٹرانک نظام کے ذریعے ذاتی حاضری کی درخواست دے سکیں گے، جس پر کمیٹی سات ورکنگ دنوں کے اندر فیصلہ کرنے کی پابند ہوگی۔
نئے نظام میں منظور شدہ تکنیکی اور سائبر سکیورٹی معیارات پر عمل درآمد کو بھی لازمی قرار دیا گیا ہے۔ حکام کے مطابق یہ فیصلہ عملی طور پر نافذ العمل ہوچکا ہے اور یہ عمان میں ڈیجیٹل تبدیلی، شفاف عدالتی نظام اور کرایہ داری تنازعات کے مؤثر حل کی جانب ایک اہم پیش رفت قرار دیا جا رہا ہے۔
About The Author
