فیفا اور ٹک ٹاک نے فیفا ورلڈ کپ 2026 کی ڈیجیٹل کوریج کو وسعت دینے اور شائقین کو منفرد تجربہ فراہم کرنے کے لیے اپنی نوعیت کے پہلے ’’پریفرڈ پلیٹ فارم‘‘ معاہدے پر دستخط کر دیے ہیں، جس کا مقصد فٹ بال کی تاریخ کے سب سے بڑے ایونٹ کو دنیا بھر میں کروڑوں افراد کے لیے مزید قابلِ رسائی بنانا ہے۔
اس شراکت داری کے تحت ٹک ٹاک کو فیفا کا پہلا باضابطہ ترجیحی پلیٹ فارم قرار دیا گیا ہے، جس کے نتیجے میں شائقین کو میچز کے پردے کے پیچھے کے مناظر، خصوصی ڈیجیٹل مواد اور انٹرایکٹو فیچرز تک براہ راست رسائی حاصل ہو گی۔ ٹک ٹاک پر ایک مخصوص ’’فیفا ورلڈ کپ 2026 ہب‘‘ قائم کیا جائے گا جہاں میچ ٹکٹوں، دیکھنے کی معلومات اور گیمنگ سہولیات سمیت مختلف سہولتیں دستیاب ہوں گی۔
معاہدے کے تحت براڈکاسٹرز اور آفیشل میڈیا پارٹنرز کو ٹک ٹاک پر لائیو سٹریمنگ، میچ کلپس شیئر کرنے اور اشتہارات کے ذریعے آمدنی حاصل کرنے کے مواقع بھی فراہم کیے جائیں گے۔ ساتھ ہی ٹک ٹاک فیفا کے انٹلیکچوئل پراپرٹی حقوق کے تحفظ کے لیے پائریسی کے خلاف سخت پالیسیاں نافذ کرے گا۔
فیفا اور ٹک ٹاک پہلی مرتبہ مشترکہ طور پر ایک جامع ’’کریئیٹر پروگرام‘‘ بھی شروع کریں گے، جس کے تحت دنیا بھر سے منتخب کریئیٹرز کو پریس کانفرنسز اور تربیتی سیشنز تک رسائی دی جائے گی تاکہ وہ اپنے فالوورز کو ورلڈ کپ کے مناظر ایک نئے اور منفرد زاویے سے دکھا سکیں۔
فیفا کے سیکرٹری جنرل ماتیاس گرافسٹروم نے کہا کہ مقصد فیفا ورلڈ کپ 2026 کی خوشیاں زیادہ سے زیادہ شائقین تک پہنچانا ہے اور اس کے لیے ٹک ٹاک سے بہتر کوئی پلیٹ فارم نہیں ہو سکتا، جبکہ ٹک ٹاک کے گلوبل ہیڈ آف کنٹینٹ جیمز اسٹافورڈ کے مطابق پلیٹ فارم پر فٹ بال کے مواد کی مقبولیت میں تیزی سے اضافہ ہو رہا ہے اور 42 فیصد صارفین لائیو میچز دیکھنے میں گہری دلچسپی ظاہر کر رہے ہیں۔
یہ معاہدہ 2023 کے فیفا ویمنز ورلڈ کپ کی کامیابی کے بعد طے پایا ہے جس کی ویڈیوز ٹک ٹاک پر اربوں بار دیکھی گئیں، اور اب 2026 کے 48 ٹیموں پر مشتمل ورلڈ کپ کو ڈیجیٹل دنیا میں نئی بلندیوں تک پہنچانے کے لیے اس تعاون کو مزید وسعت دی گئی ہے۔
About The Author
