یورپی ممالک نے گرین لینڈ پر قبضے سے متعلق امریکی صدر ڈونلڈ ٹرمپ کی دھمکیوں کے بعد پیدا ہونے والی صورتحال سے نمٹنے کے لیے سنجیدہ غور و خوض شروع کر دیا ہے۔ خبر رساں ادارے تاس کے مطابق اس حوالے سے بیلجیم کے دارالحکومت برسلز میں یورپی سفارتکاروں کے ایک اجلاس میں بتایا گیا کہ یورپی یونین کے بعض حلقے امریکی انتظامیہ کے سربراہ کے ساتھ براہ راست تصادم کے لیے تیار رہنے کا مطالبہ کر رہے ہیں، جو اس بات کی نشاندہی کرتا ہے کہ یورپی حکومتیں اب ٹرمپ کی دھمکیوں کو پہلے کے مقابلے میں کہیں زیادہ سنجیدگی سے لے رہی ہیں۔
رپورٹ میں کہا گیا ہے کہ نیٹو کے سفیروں نے آرکٹک خطے میں دفاعی اخراجات میں اضافے، اضافی فوجی سازوسامان کی تعیناتی اور فوجی مشقوں کو تیز کرنے کی تجاویز پیش کی ہیں تاکہ امریکا پر واضح کیا جا سکے کہ گرین لینڈ کا خطہ مناسب حد تک محفوظ ہے۔ نیٹو کے یورپی ارکان نے گرین لینڈ میں ممکنہ امریکی فوجی مداخلت کو روکنے کے لیے دو مراحل پر مشتمل سفارتی کوششوں کا آغاز بھی کر دیا ہے۔
ادھر یورپی یونین کی خارجہ پالیسی کی سربراہ کاجا کیلس نے کہا ہے کہ یورپی یونین اس بات پر غور کر رہی ہے کہ اگر گرین لینڈ پر قبضے سے متعلق امریکی دھمکیاں حقیقت کا روپ دھارتی ہیں تو اس کے جواب میں کس نوعیت کا ردعمل اختیار کیا جانا چاہیے۔
About The Author
