امریکی صدر ڈونلڈ ٹرمپ نے اعلان کیا ہے کہ وہ اگلے ہفتے واشنگٹن میں وینزویلا کی اپوزیشن رہنما ماریا کورینا مچاڈو سے ملاقات کریں گے۔
یہ ملاقات ایسے وقت میں متوقع ہے جب وینزویلا میں سیاسی عدم استحکام، عبوری انتظام اور نکولس مادورو کی گرفتاری کے بعد عالمی ردِعمل میں تیزی آ گئی ہے، جبکہ امریکا کی جانب سے تیل سے متعلق نئی حکمت عملی پر بھی بین الاقوامی توجہ مرکوز ہے۔
ماریا کورینا مچاڈو، جو حال ہی میں نوبل امن انعام حاصل کر چکی ہیں، آئندہ ہفتے واشنگٹن پہنچ رہی ہیں اور صدر ٹرمپ کے ساتھ ان کی یہ پہلی باضابطہ ملاقات ہوگی۔ ایک انٹرویو میں صدر ٹرمپ نے کہا کہ وہ ماریا کو خوش آمدید کہنے اور ان سے ملاقات کے منتظر ہیں۔
ماریا کورینا مچاڈو وینزویلا کی نمایاں اپوزیشن شخصیت ہیں جو جمہوری اصولوں کے تحفظ، شفاف انتخابات اور انسانی حقوق کے لیے سرگرم رہی ہیں۔
امریکی بیانیے کے مطابق اس ملاقات کا مقصد وینزویلا کے سیاسی عبوری مرحلے میں جمہوری عمل کی بحالی، اقتصادی تعاون خصوصاً تیل کے شعبے میں بہتری اور سرمایہ کاری میں اضافے پر تبادلۂ خیال کرنا ہے، جبکہ علاقائی امن و استحکام اور امریکا و لاطینی امریکا تعلقات کو فروغ دینا بھی ایجنڈے میں شامل ہے۔
About The Author
