افغان کرکٹرز کو سال میں صرف تین غیر ملکی ٹی ٹونٹی لیگز کھیلنے کی اجازت، اے سی بی کی نئی پالیسی منظور
کابل – افغانستان کرکٹ بورڈ (اے سی بی) نے ایک نئی پالیسی کی منظوری دے دی ہے جس کے تحت افغان کرکٹرز کو ایک سال میں زیادہ سے زیادہ تین غیر ملکی ٹی ٹونٹی لیگز میں شرکت کی اجازت ہوگی۔
ای ایس پی این کے مطابق یہ فیصلہ کابل میں منعقدہ افغانستان کرکٹ بورڈ کے سالانہ اجلاس کے دوران کیے گئے اہم پالیسی فیصلوں میں شامل ہے۔ اے سی بی کی جانب سے جاری بیان میں کہا گیا ہے کہ اس اقدام کا مقصد کھلاڑیوں کی جسمانی فٹنس، ذہنی صحت اور قومی ذمہ داریوں کے لیے بہترین کارکردگی کو یقینی بنانا ہے۔
بیان کے مطابق افغان کھلاڑی اب افغانستان پریمیئر لیگ (اے پی ایل) کے علاوہ سالانہ صرف تین بین الاقوامی فرنچائز لیگز میں شرکت کر سکیں گے تاکہ مسلسل کرکٹ کے باعث پیدا ہونے والے دباؤ کو کم کیا جا سکے۔
نئی پالیسی کے نتیجے میں افغانستان کے اسٹار اسپنر راشد خان جیسے کھلاڑی مالی طور پر متاثر ہو سکتے ہیں۔ راشد خان، جو ٹی ٹونٹی کرکٹ میں سب سے زیادہ وکٹیں لینے والے بولرز میں شامل ہیں، اس وقت آئی پی ایل، ایس اے 20، آئی ایل ٹی 20 اور میجر لیگ کرکٹ سمیت مختلف عالمی فرنچائز لیگز میں نمایاں کردار ادا کر رہے ہیں۔
اسی طرح یہ پالیسی نور احمد، مجیب الرحمان، اے ایم غضنفر اور رحمان اللہ گرباز جیسے دیگر افغان کھلاڑیوں پر بھی لاگو ہو سکتی ہے، جو دنیا بھر کی فرنچائز لیگز میں خاصی مانگ رکھتے ہیں۔
افغانستان کرکٹ بورڈ نے یہ بھی اعلان کیا ہے کہ بورڈ کی نئی پانچ ٹیموں پر مشتمل فرنچائز ٹی ٹونٹی لیگ اکتوبر 2026 کے آس پاس متحدہ عرب امارات میں شروع کی جائے گی، جو مستقبل میں افغان کرکٹ کے ڈھانچے کا ایک اہم ستون ہوگی۔
About The Author
