کراچی – گولڈن جوبلی قومی سنوکر چیمپئن شپ میں شاندار مقابلوں کا سلسلہ جاری ہے جہاں اسلام آباد سے تعلق رکھنے والے نوجوان کیوئسٹ شان نعمت نے ٹورنامنٹ کا سب سے بڑا اپ سیٹ کرتے ہوئے سیڈڈ کھلاڑی ایان مارک جان کو شکست دے دی۔
این بی پی اسپورٹس کمپلیکس کلفٹن میں کھیلے گئے لاسٹ 24 راؤنڈ کے اہم مقابلے میں شان نعمت نے شاندار کھیل کا مظاہرہ کرتے ہوئے سندھ کے ایان مارک جان کو 4-2 فریمز سے ہرا کر چیمپئن شپ سے باہر کر دیا، جس کے بعد شائقین سنوکر میں خاصا جوش و خروش دیکھنے میں آیا۔
لاسٹ 24 راؤنڈ میں دیگر مقابلوں میں خیبرپختونخوا کے آکاش رفیق نے اپنے ہی صوبے کے مدثر یعقوب کو یکطرفہ مقابلے کے بعد 4-0 سے شکست دی۔ پنجاب کے اویس منیر نے بلوچستان کے زیب خان کو سخت مقابلے کے بعد 4-2 سے ہرایا۔
اسی طرح سندھ کے عبدالستار نے اپنے صوبے کے محمد فیضان کو 4-0 سے مات دی، جبکہ این بی پی کے تجربہ کار کھلاڑی محمد آصف نے سندھ کے ذوالفقار اے قادر کو بغیر کوئی فریم دیے 4-0 سے شکست دے کر اپنی برتری ثابت کی۔
ایک اور مقابلے میں این بی پی کے ہی محمد سجاد نے سندھ کے سلطان محمد کو 4-2 سے زیر کر لیا۔ اسلام آباد کے عبدالجاوید نے سندھ کے علی رضا کو 4-1 سے شکست دی، جبکہ سندھ کے سید حسنین اختر نے پنجاب کے آصف ٹوبہ کو 4-2 سے ہرا کر اگلے مرحلے میں جگہ بنا لی۔
گولڈن جوبلی قومی سنوکر چیمپئن شپ میں ملک بھر سے نامور اور ابھرتے ہوئے کیوئسٹ شریک ہیں، جہاں نوجوان کھلاڑیوں کی شاندار کارکردگی ٹورنامنٹ کو مزید دلچسپ بنا رہی ہے۔ ایان مارک جان جیسے سیڈڈ کھلاڑی کی شکست نے مقابلوں کے نتائج کو غیر متوقع بنا دیا ہے اور آنے والے راؤنڈز میں مزید سنسنی خیز مقابلوں کی توقع کی جا رہی ہے۔
چیمپئن شپ کے آئندہ میچز میں کوارٹر فائنل مرحلے تک رسائی کے لیے کھلاڑیوں کے درمیان سخت مقابلے متوقع ہیں، جبکہ شائقین کی نظریں اب اگلے راؤنڈ کے بڑے مقابلوں پر مرکوز ہو چکی ہیں۔
About The Author
