تہران – ایران کے سرکاری نشریاتی ادارے کو آج علی الصبح ایک بڑے سائبر حملے کا سامنا کرنا پڑا، جس کے دوران سرکاری ٹیلی ویژن کے متعدد چینلز پر چند منٹ تک حکومت مخالف پیغامات اور اپوزیشن کی ویڈیوز نشر ہوتی رہیں۔
حزبِ اختلاف سے وابستہ خبر رساں پلیٹ فارم ایران انٹرنیشنل کے مطابق یہ واقعہ صبح تقریباً 1 بج کر 53 منٹ پر پیش آیا، جب سرکاری نشریات اچانک معطل ہو گئیں اور ان کی جگہ جلاوطن ایرانی ولی عہد شہزادہ رضا پہلوی کی تقریر نشر کی گئی۔
رپورٹ کے مطابق نشریات کے دوران ایران بھر میں ہونے والے حکومت مخالف مظاہروں کی ویڈیوز بھی دکھائی گئیں، جن میں عوام کو احتجاج کے لیے سڑکوں پر نکلنے کی اپیل کی گئی تھی۔
ابتدائی معلومات کے مطابق یہ ہیکنگ سیٹلائٹ براڈکاسٹ سسٹم کے ذریعے کی گئی، جس کے باعث ایک سے زائد سرکاری چینلز بیک وقت متاثر ہوئے۔ چند منٹ بعد سرکاری نشریات بحال کر دی گئیں، تاہم اس دوران نشر ہونے والا مواد سوشل میڈیا پر تیزی سے وائرل ہو گیا۔
ایرانی حکام کی جانب سے تاحال اس واقعے پر کوئی باضابطہ بیان جاری نہیں کیا گیا، البتہ سرکاری ذرائع نے اسے “دشمن عناصر کی نفسیاتی جنگ” قرار دیتے ہوئے مکمل تحقیقات شروع کرنے کا عندیہ دیا ہے۔
سیاسی مبصرین کے مطابق یہ واقعہ ایسے وقت سامنے آیا ہے جب ایران پہلے ہی اندرونی دباؤ، معاشی مشکلات اور بیرونی پابندیوں کے باعث شدید سیاسی تناؤ کا شکار ہے۔ جلاوطن اپوزیشن کی جانب سے اس نوعیت کی براہِ راست نشری مداخلت کو حالیہ برسوں میں ایک غیر معمولی پیش رفت قرار دیا جا رہا ہے۔
یاد رہے کہ شہزادہ رضا پہلوی، جو ایران کے سابق شاہ محمد رضا پہلوی کے صاحبزادے ہیں، طویل عرصے سے جلاوطنی میں مقیم ہیں اور ایرانی حکومت کے سخت ناقد سمجھے جاتے ہیں۔ وہ ماضی میں بھی ملک کے اندر احتجاجی تحریکوں کی حمایت کرتے رہے ہیں۔
ماہرین کا کہنا ہے کہ سرکاری ٹی وی کی ہیکنگ نہ صرف ایران کی نشریاتی سلامتی پر سوالیہ نشان ہے بلکہ یہ واقعہ آنے والے دنوں میں حکومت اور اپوزیشن کے درمیان سائبر محاذ پر کشیدگی میں اضافے کا پیش خیمہ بھی بن سکتا ہے۔
About The Author
