ہرارے – آئی سی سی انڈر 19 مینز کرکٹ ورلڈ کپ میں پاکستان نے شاندار کم بیک کرتے ہوئے گروپ مرحلے کے اہم مقابلے میں اسکاٹ لینڈ کو 6 وکٹ سے شکست دے دی ۔
ہرارے میں کھیلے گئے میچ میں اسکاٹ لینڈ نے ٹاس جیت کر پہلے بیٹنگ کا فیصلہ کیا، تاہم پاکستانی بولرز نے منظم کارکردگی کا مظاہرہ کرتے ہوئے حریف ٹیم کو بڑا اسکور بنانے سے روک دیا۔ اسکاٹ لینڈ کی پوری ٹیم 49ویں اوور میں 187 رنز بنا کر آؤٹ ہوگئی۔
اسکاٹش کپتان تھامس نائٹ نے 37 رنز کی مزاحمتی اننگز کھیلی، جبکہ فنلے جونز 33 اور اولی جونز 30 رنز کے ساتھ نمایاں رہے، تاہم دیگر بیٹرز پاکستانی بولنگ کے سامنے زیادہ دیر وکٹ پر نہ ٹھہر سکے۔
پاکستان کی جانب سے فاسٹ بولر علی رضا نے شاندار بولنگ کرتے ہوئے 37 رنز کے عوض 4 وکٹیں حاصل کیں، جبکہ مومن قمر نے 46 رنز دے کر 3 کھلاڑیوں کو پویلین واپس بھیجا۔ دونوں بولرز نے درمیانی اوورز میں اسکاٹ لینڈ کی بیٹنگ لائن کو مکمل طور پر قابو میں رکھا۔
188 رنز کے ہدف کے تعاقب میں پاکستانی اوپنرز نے محتاط آغاز فراہم کیا۔ اگرچہ ابتدائی مراحل میں چند وکٹیں گریں، تاہم مڈل آرڈر نے ذمہ دارانہ بیٹنگ کرتے ہوئے ٹیم کو فتح سے ہمکنار کیا۔
عثمان خان نے عمدہ بیٹنگ کا مظاہرہ کرتے ہوئے 75 رنز کی شاندار اننگ کھیلی، جس میں اعتماد، شاٹس کا درست انتخاب اور اسٹرائیک روٹیشن نمایاں رہی۔ ان کا بھرپور ساتھ احمد حسین نے دیا جنہوں نے 47 رنز اسکور کیے۔
پاکستانی ٹیم نے مطلوبہ ہدف 44ویں اوور میں 4 وکٹ کے نقصان پر حاصل کرلیا اور ٹورنامنٹ میں پہلی کامیابی سمیٹ لی۔
اسکاٹ لینڈ کی جانب سے اولی جونز اور مانو سرسوت نے دو، دو وکٹیں حاصل کیں، تاہم ان کی کوششیں ٹیم کو شکست سے نہ بچا سکیں۔
دوسری جانب ونڈہوک میں کھیلے گئے گروپ میچ میں جنوبی افریقا نے تنزانیہ کو یکطرفہ مقابلے کے بعد 329 رنز کے بڑے مارجن سے شکست دے دی۔
جنوبی افریقی ٹیم نے پہلے بیٹنگ کرتے ہوئے 5 وکٹ کے نقصان پر 397 رنز کا پہاڑ جیسا اسکور کھڑا کیا۔ جواب میں تنزانیہ کی پوری ٹیم صرف 68 رنز پر ڈھیر ہوگئی۔
جنوبی افریقا کی جانب سے مجولا اور جیسن راؤلز نے دو، دو وکٹیں حاصل کیں اور حریف بیٹنگ لائن کو مکمل طور پر ناکام بنا دیا۔
About The Author
