پاکستان سپر لیگ (پی ایس ایل) کے 11ویں ایڈیشن کے پلیئرز آکشن کے سلسلے میں قذافی اسٹیڈیم لاہور میں ایک ورکشاپ منعقد کی گئی، جس میں تمام متعلقہ اسٹیک ہولڈرز کو مدعو کیا گیا۔ ورکشاپ کا مقصد آکشن کے طریقۂ کار، قواعد اور مراحل سے آگاہی فراہم کرنا تھا۔
ورکشاپ میں چیئرمین پاکستان کرکٹ بورڈ محسن نقوی نے بھی شرکت کی اور فرنچائزز کے ساتھ پلیئرز کو برقرار رکھنے کی تعداد سے متعلق مشاورت کی۔ محسن نقوی نے اس موقع پر کہا کہ تمام فرنچائزز کو یکساں لیول پلیئنگ فیلڈ فراہم کی جائے گی تاکہ مقابلہ شفاف اور منصفانہ رہے۔
پی ایس ایل کے چیف ایگزیکٹیو آفیسر سلمان نصیر نے آکشن ورکشاپ کے مختلف پہلوؤں پر بریفنگ دی، جس میں پلیئرز کی کیٹیگریز، بیس پرائس اور آکشن کے مجموعی فریم ورک پر روشنی ڈالی گئی۔ ورکشاپ کے ذریعے فرنچائزز اور کھلاڑیوں کو آکشن کے عمل کو بہتر طور پر سمجھنے کا موقع ملا۔
اس موقع پر قومی کرکٹرز اور فرنچائز نمائندگان کی بڑی تعداد شریک ہوئی، جن میں سلمان علی آغا، بابر اعظم، حسن علی، فخر زمان، شاداب خان، فہیم اشرف، سلمان مرزا، شاہین شاہ آفریدی، حسن نواز، نسیم شاہ، عثمان خان، وسیم جونیئر اور محمد نواز شامل تھے۔ ورکشاپ کے انعقاد کو پی ایس ایل 11 کے لیے تیاریوں کا اہم مرحلہ قرار دیا جا رہا ہے۔
About The Author
