تہران — ایران کی سپریم نیشنل سکیورٹی کونسل کے سیکرٹری علی لاریجانی نے کہا ہے کہ یورپی ممالک کی افواج کو ایران دہشت گرد تنظیمیں سمجھتا ہے۔ یہ بیان یورپی یونین کی جانب سے پاسدارانِ انقلاب کے خلاف اقدامات پر ردعمل میں سامنے آیا ہے۔
علی لاریجانی نے کہا کہ یورپی یونین ایران کے داخلی قوانین سے بخوبی آگاہ ہے، اس کے باوجود ایسے فیصلے کیے جا رہے ہیں جو بین الاقوامی اصولوں اور سفارتی ضوابط کے منافی ہیں۔
انہوں نے واضح کیا کہ ایرانی پارلیمنٹ نے اپریل 2019 میں ایک قانون منظور کیا تھا جس کے تحت پاسدارانِ انقلاب کے خلاف پابندیاں عائد کرنے یا اسے بلیک لسٹ کرنے والے فریقین کو دہشت گرد تصور کیا جاتا ہے۔
ایرانی سپریم نیشنل سکیورٹی کونسل کے سیکرٹری کے مطابق،
“جو بھی ایران کی مسلح افواج یا پاسدارانِ انقلاب کو دہشت گرد قرار دیتا ہے، وہ خود ایرانی قانون کے تحت دہشت گردی کے زمرے میں آتا ہے۔”
تجزیہ کاروں کے مطابق یہ بیان ایسے وقت سامنے آیا ہے جب یورپی یونین ایران کے خلاف انسانی حقوق، داخلی جبر اور روس کو فوجی معاونت فراہم کرنے کے الزامات کے تحت پابندیوں میں اضافہ کر رہی ہے، جس سے ایران اور یورپ کے تعلقات مزید کشیدگی کا شکار ہوتے جا رہے ہیں۔
About The Author
