طرابلس – لیبیا کے ساحل کے قریب تارکینِ وطن کو لے جانے والی ایک کشتی ڈوبنے کے نتیجے میں 2 بچوں سمیت کم از کم 55 افراد ہلاک یا لاپتہ ہو گئے ہیں۔
انٹرنیشنل آرگنائزیشن آف مائیگریشن (IOM) کے مطابق یہ افسوسناک حادثہ 6 فروری کو لیبیا کے ساحلی شہر زوارہ کے شمال میں پیش آیا۔ کشتی میں سوار تارکینِ وطن مختلف افریقی ممالک سے تعلق رکھتے تھے جو بہتر مستقبل کی تلاش میں یورپ جانے کی کوشش کر رہے تھے۔
لیبیائی حکام کا کہنا ہے کہ حادثے کے بعد شروع کی گئی تلاش اور بچاؤ کی کارروائیوں کے دوران صرف نائجیریا سے تعلق رکھنے والی دو خواتین کو زندہ بچایا جا سکا، جبکہ باقی افراد کا اب تک کوئی سراغ نہیں مل سکا۔
میڈیا رپورٹس کے مطابق زندہ بچ جانے والی ایک خاتون نے بتایا کہ اس حادثے میں اس کے شوہر جان کی بازی ہار گئے، جبکہ دوسری خاتون نے اپنے دو بچوں کی ہلاکت کی تصدیق کی ہے، جس نے اس سانحے کو مزید المناک بنا دیا۔
متاثرہ خواتین کے مطابق تارکینِ وطن اور پناہ گزینوں کو لے جانے والی یہ کشتی 5 فروری کی رات تقریباً 11 بجے لیبیا کے شہر الزاویہ سے روانہ ہوئی تھی۔ روانگی کے تقریباً چھ گھنٹے بعد کشتی میں پانی بھرنا شروع ہو گیا، جس کے باعث وہ توازن برقرار نہ رکھ سکی اور الٹ گئی۔
انسانی حقوق کی تنظیموں نے ایک بار پھر بحیرۂ روم کے راستے ہونے والی غیر قانونی نقل مکانی کے خطرناک نتائج پر تشویش کا اظہار کرتے ہوئے عالمی برادری سے مؤثر اقدامات کا مطالبہ کیا ہے۔
About The Author
