سری نگر/مظفرآباد – مقبوضہ جموں و کشمیر اور لائن آف کنٹرول (ایل او سی) کے دونوں جانب آج تحریکِ آزادی کشمیر کے رہنما محمد افضل گورو کا یومِ شہادت منایا جا رہا ہے۔ اس موقع پر کشمیری عوام ان کی جدوجہد کو یاد کرتے ہوئے انہیں خراجِ عقیدت پیش کر رہے ہیں۔
محمد افضل گورو کو 9 فروری 2013 کو نئی دہلی کی تہاڑ جیل میں پھانسی دی گئی تھی۔ ان پر بھارتی پارلیمنٹ پر حملے میں ملوث ہونے کا الزام عائد کیا گیا تھا، تاہم کشمیری قیادت اور متعدد انسانی حقوق کی تنظیموں نے ان کے مقدمے کو متنازع قرار دیتے ہوئے ٹرائل کے طریقۂ کار پر سوالات اٹھائے اور اسے شفاف عدالتی تقاضوں کے منافی قرار دیا۔
رپورٹس کے مطابق پھانسی کے بعد محمد افضل گورو کی میت اہلِ خانہ کے حوالے نہیں کی گئی اور انہیں تہاڑ جیل کے احاطے میں ہی دفن کر دیا گیا۔ اس اقدام پر انسانی اور اخلاقی اقدار کی خلاف ورزی سے متعلق اعتراضات بھی سامنے آئے تھے، جن پر عالمی سطح پر بحث کی گئی۔
کشمیری حلقوں کا کہنا ہے کہ محمد افضل گورو کی پھانسی نے مقبوضہ کشمیر میں پہلے سے موجود سیاسی بے چینی میں مزید اضافہ کیا اور حقِ خودارادیت کے مطالبے کو نئی تقویت ملی۔ یومِ شہادت کے موقع پر مختلف علاقوں میں دعائیہ تقریبات منعقد کی جا رہی ہیں جبکہ بعض مقامات پر خاموش احتجاج بھی ریکارڈ کیا گیا ہے۔
About The Author
