بھارت میں امریکا کے ساتھ ہونے والے مجوزہ تجارتی معاہدے کے خلاف کسان سراپا احتجاج بن گئے اور دارالحکومت نیو دہلی میں ہزاروں کی تعداد میں سڑکوں پر نکل آئے۔ مظاہرین نے حکومت سے مطالبہ کیا کہ معاہدہ فوری طور پر ختم کیا جائے کیونکہ یہ مقامی زرعی پیداوار کیلئے شدید نقصان دہ ثابت ہوگا۔
کسان رہنماؤں کا کہنا تھا کہ اگر بھارتی منڈی کو امریکی زرعی مصنوعات کیلئے مزید کھول دیا گیا تو مقامی کسان عالمی مقابلے کا سامنا نہیں کر سکیں گے، جس سے قیمتیں گر جائیں گی اور چھوٹے کاشتکار متاثر ہوں گے۔
مجوزہ معاہدے کے تحت بھارتی اشیاء پر امریکی ٹیرف میں کمی متوقع ہے جبکہ بھارت امریکا سے زرعی مصنوعات کی درآمدات بڑھائے گا۔ اس کے علاوہ توانائی کے شعبے میں بھی تبدیلی متوقع ہے جس کے تحت بھارت روسی تیل کی درآمدات کم یا ختم کر سکتا ہے۔
مظاہرین نے خبردار کیا کہ حکومت نے اگر کسانوں کے تحفظ کیلئے پالیسی نہ بنائی تو احتجاج کا دائرہ مزید وسیع کیا جائے گا۔ تجزیہ کاروں کے مطابق یہ معاملہ نہ صرف تجارتی بلکہ سیاسی نوعیت بھی اختیار کر سکتا ہے کیونکہ بھارت میں کسان پہلے ہی زرعی اصلاحات کے معاملے پر حکومت کے خلاف احتجاج کر چکے ہیں۔
About The Author
