نائیجیریا کی شمالی ریاست نائجر ریاست میں موٹر سائیکلوں پر سوار مسلح افراد کے حملوں میں کم از کم 32 افراد ہلاک جبکہ درجنوں افراد کو اغوا کر لیا گیا۔
ریاستی پولیس کے ترجمان واسیو ابیودون نے تصدیق کی کہ حملہ آوروں نے تین دیہات کو نشانہ بنایا۔ ان کے مطابق ٹُنگا ماکیری گاؤں میں چھ افراد قتل کیے گئے، متعدد گھروں کو آگ لگا دی گئی اور کئی افراد کو اغوا کیا گیا، جس کے بعد حملہ آور کونکوسو کی طرف بڑھ گئے۔
مقامی ذرائع کے مطابق کونکوسو میں صبح سویرے اندھا دھند فائرنگ کی گئی جہاں ہلاکتوں کی تعداد 26 سے 38 کے درمیان بتائی جا رہی ہے۔ گاؤں میں پولیس اسٹیشن کو بھی نذرِ آتش کر دیا گیا جبکہ کئی افراد لاپتا ہیں۔
بعد ازاں حملہ آوروں نے پِیسا گاؤں پر بھی دھاوا بول دیا جہاں ایک شخص کو قتل کر دیا گیا اور بیشتر مکانات کو آگ لگا دی گئی۔
نائجر اور کوارا ریاستوں کی سرحد کے قریب واقع کینجی جنگل کو شدت پسند اور مسلح گروہوں کی محفوظ پناہ گاہ سمجھا جاتا ہے جہاں ماضی میں بوکوحرام سمیت دیگر گروہ سرگرم رہے ہیں۔
مقامی مذہبی و سماجی رہنماؤں نے صدر مملکت سے مطالبہ کیا ہے کہ علاقے میں مستقل فوجی اڈہ قائم کیا جائے تاکہ حملوں کا سلسلہ روکا جا سکے۔
یاد رہے کہ امریکا کے صدر ڈونلڈ ٹرمپ نے گزشتہ برس نائیجیریا کی سیکیورٹی صورتحال پر تنقید کی تھی، تاہم حکام کا کہنا ہے کہ ملک میں مسیحیوں اور مسلمانوں دونوں کو شدت پسندی کا سامنا ہے اور کسی ایک مذہبی گروہ کو منظم طور پر نشانہ نہیں بنایا جا رہا۔
About The Author
